Yana ikki davlat Eron samolyotlariga osmonini yopdi

Birlashgan Arab Amirliklari va Iroq AQSH sanksiyalarini ijro etish doirasida Eron aviakompaniyalarining parvozlarini to‘xtatdi. BAA barcha Eron reyslarini bekor qilgan bo‘lsa, Iroqning Najaf, shuningdek Kurdiston hududidagi Erbil va Sulaymoniya aeroportlarida Eron bilan parvozlar to‘xtatilmoqda. Bu haqda “Al Arabiya” xabar berdi.

Qayd etilishicha, BAA fuqaro aviatsiyasi boshqarmasi mazkur qarorni AQSHning Eron aviakompaniyalariga qarshi sanksiyalari sabab qabul qilgan. Dubay Eron aviakompaniyalari uchun muhim yo‘nalishlardan biri hisoblanadi. Eronning bir nechta aviakompaniyalari Dubayga kuniga bir necha marta parvozlarni amalga oshirib kelgan. Shaharda Erondan katta guruh istiqomat qiladi va ikki davlat o‘rtasida yaqin biznes aloqalari mavjud.

BAA bundan avval ham Eronga nisbatan cheklovlar joriy qilgan. Xususan, o‘tgan oy mamlakat Eron bilan savdo va moliyaviy operatsiyalarni to‘xtatgan. Joriy yilning 23 sentyabr kuni esa BAA Markaziy banki Eronning “Bank Melli” banki filiallarining mamlakatga va mamlakatdan pul o‘tkazmalarini bloklagan.

AQSH sentyabr oyining boshida Eron aviatsiya sektoriga qarshi sanksiyalar joriy qilgan va ushbu soha bilan hamkorlik qiluvchi kompaniyalarga nisbatan qat’iy choralar ko‘rishini bildirgan. Kompaniyalarga Eron samolyotlariga yonilg‘i quyishni to‘xtatish kabi talablarni bajarish uchun 24 sentyabrgacha muddat berilgan.

Shundan so‘ng, Eronning asosiy aviakompaniyalari xalqaro reyslarini bekor qilishga majbur bo‘lgan. Shunga qaramay, ayrim kichik Eron aviakompaniyalari, xususan, Xitoy va Armanistonga parvozlarni davom ettirmoqda.

Iroqning shialar uchun muqaddas shahar hisoblangan Najafdagi xalqaro aeroport ham Eron bilan barcha aviaqatnovlarni to‘xtatdi. Bu haqda aeroport direktori Husayn Muhanna ma’lum qilgan.

Uning aytishicha, Eron va Najaf aeroporti o‘rtasidagi barcha reyslar Najaf gubernatoriga Bosh vazir devonidan berilgan ko‘rsatma ortidan to‘xtatilgan.

Shuningdek, Iroq Kurdistonidagi Erbil va Sulaymoniya aeroportlari ham kecha, 25 sentyabrdan Eron bilan parvozlarni to‘xtatishi ma’lum qilingan.

Najaf aeroporti Eron bilan aviaqatnovlar uchun muhim markazlardan biri hisoblanadi. Ushbu reyslar asosan Iroqdagi shia ziyoratchilarini Eronning muqaddas shaharlariga, shuningdek eronliklarni Iroqdagi ziyoratgohlarga olib borishda foydalanilgan. Parvozlardan Eronda tahsil olayotgan iroqlik talabalar va davolanish uchun borayotgan bemorlar ham foydalangan.

Iroq va Eron o‘rtasidagi yaqin aloqalar ikki davlatning diniy va siyosiy rishtalari bilan bog‘liq. Najaf aeroporti direktori Eron aviakompaniyalari bilan parvozlar kecha, 25 sentyabr kuni soat 02:00 da to‘xtatilganini bildirgan.

Ma’lumotlarga ko‘ra, Iroq AQSHning Eron aviakompaniyalariga qarshi cheklovlarini ijro etishga qaror qilgan davlatlar qatoriga qo‘shilgan. Bunga qadar BAA ham xuddi shunday chorani joriy qilgan.

Eron aviakompaniyalarining xalqaro reyslarini to‘xtatish bo‘yicha cheklovlar boshqa davlatlarda ham joriy etilgan. Turkiya va Xitoyga yo‘nalishlar esa hozircha ochiq qolgan.

Shuningdek, 25 sentyabr kuni Turkmaniston Tehrondan Душанбе­га uchayotgan Eron samolyotini ortga qaytargan. Eron fuqaro aviatsiyasi tashkiloti vakili Majid Axtavanning aytishicha, bunga Turkmanistonning Eron aviakompaniyalariga parvoz uchun ruxsat bermagani sabab bo‘lgan.

Eronning qariyb 30 ta aviakompaniyasi mavjud bo‘lib, ularning aksariyati ichki va mintaqaviy yo‘nalishlarda faoliyat yuritadi. “Iran Air” milliy aviakompaniya, “Mahan” esa xalqaro qatnovlarda faol bo‘lgan yirik xususiy tashuvchilardan hisoblanadi.

Eslatib o‘tamiz, avvalroq Eron qo‘shni davlatlar AQSH bilan hamkorlik qilib, Eron reyslarini to‘xtatsa, ularning aeroportlari faoliyatini izdan chiqarishini ma’lum qilgan edi.