Яна икки давлат Эрон самолётларига осмонини ёпди

Бирлашган Араб Амирликлари ва Ироқ АҚШ санкцияларини ижро этиш доирасида Эрон авиакомпанияларининг парвозларини тўхтатди. БАА барча Эрон рейсларини бекор қилган бўлса, Ироқнинг Нажаф, шунингдек Курдистон ҳудудидаги Эрбил ва Сулаймония аэропортларида Эрон билан парвозлар тўхтатилмоқда. Бу ҳақда “Al Arabiya” хабар берди.

Қайд этилишича, БАА фуқаро авиацияси бошқармаси мазкур қарорни АҚШнинг Эрон авиакомпанияларига қарши санкциялари сабаб қабул қилган. Дубай Эрон авиакомпаниялари учун муҳим йўналишлардан бири ҳисобланади. Эроннинг бир нечта авиакомпаниялари Дубайга кунига бир неча марта парвозларни амалга ошириб келган. Шаҳарда Эрондан катта гуруҳ истиқомат қилади ва икки давлат ўртасида яқин бизнес алоқалари мавжуд.

БАА бундан аввал ҳам Эронга нисбатан чекловлар жорий қилган. Хусусан, ўтган ой мамлакат Эрон билан савдо ва молиявий операцияларни тўхтатган. Жорий йилнинг 23 сентябрь куни эса БАА Марказий банки Эроннинг “Bank Melli” банки филиалларининг мамлакатга ва мамлакатдан пул ўтказмаларини блоклаган.

АҚШ сентябрь ойининг бошида Эрон авиация секторига қарши санкциялар жорий қилган ва ушбу соҳа билан ҳамкорлик қилувчи компанияларга нисбатан қатъий чоралар кўришини билдирган. Компанияларга Эрон самолётларига ёнилғи қуйишни тўхтатиш каби талабларни бажариш учун 24 сентябргача муддат берилган.

Шундан сўнг, Эроннинг асосий авиакомпаниялари халқаро рейсларини бекор қилишга мажбур бўлган. Шунга қарамай, айрим кичик Эрон авиакомпаниялари, хусусан, Хитой ва Арманистонга парвозларни давом эттирмоқда.

Ироқнинг шиалар учун муқаддас шаҳар ҳисобланган Нажафдаги халқаро аэропорт ҳам Эрон билан барча авиақатновларни тўхтатди. Бу ҳақда аэропорт директори Ҳусайн Муҳанна маълум қилган.

Унинг айтишича, Эрон ва Нажаф аэропорти ўртасидаги барча рейслар Нажаф губернаторига Бош вазир девонидан берилган кўрсатма ортидан тўхтатилган.

Шунингдек, Ироқ Курдистонидаги Эрбил ва Сулаймония аэропортлари ҳам кеча, 25 сентябрдан Эрон билан парвозларни тўхтатиши маълум қилинган.

Нажаф аэропорти Эрон билан авиақатновлар учун муҳим марказлардан бири ҳисобланади. Ушбу рейслар асосан Ироқдаги шиа зиёратчиларини Эроннинг муқаддас шаҳарларига, шунингдек эронликларни Ироқдаги зиёратгоҳларга олиб боришда фойдаланилган. Парвозлардан Эронда таҳсил олаётган ироқлик талабалар ва даволаниш учун бораётган беморлар ҳам фойдаланган.

Ироқ ва Эрон ўртасидаги яқин алоқалар икки давлатнинг диний ва сиёсий ришталари билан боғлиқ. Нажаф аэропорти директори Эрон авиакомпаниялари билан парвозлар кеча, 25 сентябрь куни соат 02:00 да тўхтатилганини билдирган.

Маълумотларга кўра, Ироқ АҚШнинг Эрон авиакомпанияларига қарши чекловларини ижро этишга қарор қилган давлатлар қаторига қўшилган. Бунга қадар БАА ҳам худди шундай чорани жорий қилган.

Эрон авиакомпанияларининг халқаро рейсларини тўхтатиш бўйича чекловлар бошқа давлатларда ҳам жорий этилган. Туркия ва Хитойга йўналишлар эса ҳозирча очиқ қолган.

Шунингдек, 25 сентябрь куни Туркманистон Теҳрондан Душанбе­га учаётган Эрон самолётини ортга қайтарган. Эрон фуқаро авиацияси ташкилоти вакили Мажид Ахтаваннинг айтишича, бунга Туркманистоннинг Эрон авиакомпанияларига парвоз учун рухсат бермагани сабаб бўлган.

Эроннинг қарийб 30 та авиакомпанияси мавжуд бўлиб, уларнинг аксарияти ички ва минтақавий йўналишларда фаолият юритади. “Iran Air” миллий авиакомпания, “Mahan” эса халқаро қатновларда фаол бўлган йирик хусусий ташувчилардан ҳисобланади.

Эслатиб ўтамиз, аввалроқ Эрон қўшни давлатлар АҚШ билан ҳамкорлик қилиб, Эрон рейсларини тўхтатса, уларнинг аэропортлари фаолиятини издан чиқаришини маълум қилган эди.