Ямаль Испания терма жамоаси қайдномасидан чиқарилди

“Барселона” футболчиси Ламин Ямаль 7–10 кунлик дам олишни талаб қиладиган тиббий муолажадан сўнг Испания терма жамоаси сафида майдонга туша олмайди. Бу ҳақда Испания футбол федерацияси матбуот хизмати хабар берди.

Бу ҳолат Ханси Флик бошчилигидаги “Барселона” ва Луис де ла Фуэнте бошчилигидаги Испания футбол федерацияси (RFEF) ўртасида янги зиддиятни келтириб чиқарди. “Барселона” клуби RFEF тиббий ходимларини хабардор қилмасдан, Ямалнинг жароҳатини даволаш учун инвазив радиочастота муолажасини ўтказган. Бу муолажа футболчидан камида бир ҳафта дам олишни талаб қилади. Федерация бу ҳақда терма жамоанинг Лас Розасдаги йиғини бошланишидан атиги бир неча соат олдин хабар топган.

Натижада 18 ёшли Ямал 2026 йилги жаҳон чемпионати саралаш босқичида Грузия ва Туркияга қарши ўйинларда иштирок эта олмайди.

“RFEF тиббиёт хизмати 10 ноябрь куни соат 13:47 да терма жамоа йиғини бошланган пайтда Ламин Ямаль ўша куни эрталаб ноқулайликни даволаш учун радиочастота муолажасидан ўтганини билганидан сўнг ҳайрат ва хавотир билдирди. Ушбу муолажа ҳақида клуб терма жамоа шифокорларига олдиндан хабар бермаган. Биз тафсилотларни йиғиндан бир кун олинган тиббий ҳисобот орқали билдик, унда футболчига 7–10 кунлик дам олиш тавсия этилган. Футболчининг соғлиғи ва хавфсизлигини инобатга олган ҳолда, RFEF Ламин Ямални жорий чақирувдан озод қилишга қарор қилди. Биз унинг тезроқ соғайиб, тўлиқ тикланиб қайтишини тилаймиз”, дейди федерация расмий баёнотида.

Эслатиб ўтамиз, аввалроқ  Ламин Ямаль жароҳати туфайли Испаниянинг октябрь ойидаги FIFA кунлари учун эълон қилинган таркибдан ҳам чиқариб юборилган эди.