Дунёнинг энг қиммат футболчилари рейтинги янгиланди. Биринчи ўринда ким?

Футболчиларнинг трансфер қийматини баҳолашга ихтисослашган “Transfermarkt” портали мутахассислари дунёнинг энг қиммат футболчилари рейтингини янгилади.

Янгиланган рўйхатда “Манчестер Сити” ҳужумчиси Эрлинг Ҳоланд ва “Барселона” вакили Ламин Ямаль биринчи ўринни бўлишиб турибди. Уларнинг трансфер қиймати 220 миллион евро деб баҳоланган. “Реал Мадрид” ҳужумчиси Килиан Мбаппе эса 200 миллион евро билан учинчи ўринни эгаллаган.

“Transfermarkt”нинг энг қиммат ўн нафар футболчиси рўйхатида бешта клуб вакиллари бор. “Реал Мадрид” ва “Пари Сен-Жермен” учтадан футболчи билан етакчилик қилмоқда. “Барселона”дан икки нафар, “Манчестер Сити” ва “Бавария”дан эса биттадан футболчи ўрин олган.

Рейтингдаги эътиборга молик ўзгаришлардан бири “Бавария” ярим ҳимоячиси Майкл Олисенинг трансфер қиймати ошгани бўлди. Унинг баҳоси 10 миллион еврога кўтарилиб, 180 миллион еврога етди. “Transfermarkt” маълумотларига кўра, 2025 йил октябрь ойида футболчининг қиймати 130 миллион евро бўлган.

“Реал Мадрид”нинг бразилиялик ҳужумчиси Винисиус Жуниорнинг трансфер қиймати эса 10 миллион еврога пасайди. Шунга қарамай, у дунёнинг энг қиммат ўн нафар футболчиси қаторида қолди. 2024-2025 йилларда унинг қиймати 200 миллион еврога етган эди.