XXI асрнинг энг яхши ҳимоячилари рейтинги эълон қилинди

Франциянинг “Canal+” нашри ўз талқини бўйича XXI асрнинг энг яхши 15 нафар ҳимоячиси рейтингини эълон қилди. Унда Серхио Рамос асрнинг энг яхши ҳимоячиси деб топилган.

Манбага кўра, ушбу рўйхатда Испания терма жамоаси ҳамда “Реал Мадрид” ҳимоячиси Серхио Рамос етакчилик қилмоқда. У замонавий футбол даврининг энг кучли ҳимоячиларидан бири сифатида эътироф этилган.

Афсонавий италиялик ҳимоячи Паоло Мальдини иккинчи ўринни эгаллаган бўлса, “Реал Мадрид” ва Бразилия терма жамоаси афсонаси Роберто Карлос учинчи поғонадан жой олган. Шунингдек, Ўзбекистон миллий терма жамоаси бош мураббийи Фабио Каннаваро ва Карлес Пуйоль ҳам ушбу рўйхатда кучли бешликка киритилган.

XXI асрнинг энг яхши 15 ҳимоячилари рўйхатидан яна қуйидаги футболчилар ўрин олган: Кафу, Алессандро Неста, Дани Алвес, Лилиан Тюрам, Рио Фердинанд, Марсело, Филипп Лам, Тиаго Силва, Рафаэль Варан.

Қайд этиш жоиз, Рамос 2005-2021 йилларда “Реал Мадрид” шарафини ҳимоя қилган ва клуб билан беш марта Испания чемпионлиги ҳамда тўрт марта Чемпионлар лигаси бош совринини қўлга киритган. 2021-2023 йилларда эса у “Пари Сен-Жермен” сафида ўйнаб, икки марта мамлакат чемпиони бўлган.