Венгрия Путинни ҳибсга оладими?
Олам
−
17 Октябрь 7363 2 дақиқа
Венгрия Россия Президенти Владимир Путиннинг АҚШ Президенти Дональд Трамп билан учрашиш учун Будапештга ташрифи чоғида Халқаро жиноий суд (ХЖС) буйруғи асосида ҳибсга олиниши хавфи йўқлигини маълум қилди. Бу ҳақда Венгрия Ташқи ишлар вазири Петер Сийярто журналистларнинг саволларига жавоб бериш чоғида айтди.
“Биз бу ерда Владимир Путинни қабул қиламиз ва у муваффақиятли музокаралар олиб боришига ҳамда кейин уйига қайтишини кафолатлаймиз”, деди вазир.
ТИВ раҳбарининг сўзларига кўра, Венгрия расмийлари АҚШ ва Россия Президентларининг хавфсиз ва осойишта муҳитда музокара ўтказиши учун барча шароитларни таъминлашга тайёр.
Сийярто, шунингдек, расмий Будапешт Путиннинг ташрифи ёки ХЖС ордери Россия Президентининг саммитда иштирок этишига тўсиқ бўладими ёки йўқлиги бўйича ўз иттифоқчилари билан маслаҳатлашишни режалаштирмаётганини айтди.
“Ким биландир маслаҳатлашишга ҳожат йўқ. Венгрия суверен давлат”, дея таъкидлади у.
16 октябрь куни АҚШ Президенти Венгрияда Путин билан учрашишини маълум қилди. Музокараларнинг аниқ санаси ҳали белгиланмаган.
Венгрия 1999 йилда Халқаро жиноий суднинг асосини ташкил этувчи Рим статутини имзолаган ва 2001 йилда уни ратификация қилган, бироқ 2023 йилдаёқ мамлакат расмийлари Путин ташриф буюрган тақдирда у ҳибсга олинмаслигини айтган.
2025 йилда Венгрия ҳукумати Исроил Бош вазири Биньямин Нетаньяхуни мамлакатга таклиф қилди. Нетаньяхунинг ташрифи ортидан Венгрия Халқаро жиноий суддан чиқишини эълон қилди. 2025 йилнинг октябрь ҳолатига кўра, Венгриянинг ХЖСдан чиқиши тугалланмаган эди.
Эслатиб ўтамиз, жорий йилнинг 8 октябрь куни Россия Президенти Владимир Путин давлат ташрифи билан Тожикистонга келганди. Аммо Раҳмон ҳукумати Путинни ҳибсга олмади. Европа Иттифоқи Путинни ҳибсга олмагани учун Тожикистонни Халқаро жиноий суд талабларини бажармаганликда айблади. Сабаби Тожикистон 2002 йилдан бери Халқаро жиноий суд аъзоси саналади.
