Венесуэлада нефть қазиб олишни тиклаш учун 10 йил керак – “Bloomberg”

Венесуэлада 1970 йиллардагидек ҳажмда нефть ишлаб чиқариш учун инфратузилмани тиклаш Америка компаниялардан 100 миллиард доллардан ортиқ маблағ ва тахминан 10 йил вақтни талаб қилади. Бу ҳақда Райс университети Бейкер Давлат сиёсати институтининг Лотин Америкаси энергетика сиёсати бўйича директори Франсиско Мональдига таяниб, “Bloomberg” хабар берди.

“Венесуэлада нефть ишлаб чиқаришни 1970 йиллардаги чўққи кўрсаткичга қайтариш учун етарли даражада инфратузилмани тиклаш Chevron Corp., Exxon Mobil Corp. ва ConocoPhillips каби компаниялардан кейинги ўн йил давомида ҳар йили тахминан 10 миллиард доллар сармоя талаб қилади”, дейди Франсиско Мональди.

Нашрга кўра, ҳозирда Венесуэлада кунига тахминан 1 миллион баррель нефть қазиб олинмоқда. Бу кўрсаткич 1974 йилда деярли 4 миллион баррель бўлган.

“Тезроқ тиклаш учун янада катта сармоя керак бўлади”, дейди эксперт.

Эслатиб ўтамиз, жорий йил 3 январь куни тунда Венесуэла пойтахти Каракас шаҳрида портлашлар содир бўлганди. Шундан сўнг АҚШ Президенти Дональд Трамп Қўшма Штатлар Венесуэлага кенг кўламли зарбалар берганини, Венесуэла президенти Николас Мадуро эса рафиқаси билан бирга қўлга олиниб, мамлакатдан олиб чиқиб кетилганини билдирди.

АҚШ расмийлари эр-хотинни “наркотерроризм”да айбламоқда, яқин вақт ичида улар АҚШ судида жавоб беради.

Ҳозирда Венесуэла вице-президенти Делси Родригес мамлакат президенти вазифасини вақтинча бажарувчи этиб тайинланган. У Мадуро ва унинг рафиқасини зудлик билан озод қилишни талаб қилмоқда. Маълум қилинишича, улар аллақачон Бруклиндаги (Нью-Йорк) тергов изоляторига етказилган.

Дастлабки маълумотларга кўра, АҚШнинг Венесуэлада ўтказган операцияси оқибатида камида 40 киши ҳалок бўлган.