Венесуэлада маҳбуслар қамоқхонани эгаллаб, исён кўтарди (видео)

Венесуэланинг Баринас штатидаги INJUBA қамоқхонасида маҳбуслар жазони ижро этиш муассасасини эгаллаб олиб, оммавий норозилик бошлади. Бу ҳақда Венесуэла қамоқхоналарини мониторинг қилиш маркази маълум қилди.

Маълумотларга кўра, 24 май куни маҳбуслар қамоқхона ҳудуди устидан назоратни қўлга олган. Норозилик акциясига 1,2 мингдан ортиқ эркак ва 100 дан зиёд аёл маҳбус қўшилган.

Нодавлат ташкилот баёнотига кўра, исёнга бир ҳафта аввал қамоқхонага янги директор этиб тайинланган Элвис Макуаре Герреро сабаб бўлган.

Маҳбуслар унинг тайинланишидан кейин шафқатсиз тинтувлар, калтаклаш ва қийноқларга дуч келганини билдирган. Шунингдек, 120 дан ортиқ маҳбус изоляторга жойлаштирилгани айтилмоқда.

Ташкилотнинг маълум қилишича, маҳбусларнинг бир қисми қамоқхона миноралари томига чиққан, айримлари эса норозилик сифатида матрасларга ўт қўйган.

Гувоҳларнинг айтишича, қамоқхона қўриқчилари ва янги директор намойиш қилаётган маҳбусларга қарата ўқ узган. Оқибатда яраланганлар борлиги айтилмоқда.

Шунингдек, маҳбуслар қариндошлари National Guard of Venezuela бўлинмаларининг қамоқхонага киришига тўсқинлик қилишга уринган, бироқ бунинг уддасидан чиқа олмаган.

Куч ишлатар тизими ҳудудга кирганидан кейин отишмалар ва портлашлар овози эшитилгани, аёллар корпусига қарши кўздан ёш оқизувчи газ қўллангани ҳам хабар қилинган.

Венесуэла расмийлари Баринасдаги вазият юзасидан ҳозирча расмий изоҳ бермаган.

Эслатиб ўтамиз, аввалроқ АҚШ Президенти Дональд Трамп Венесуэла унинг аралашувидан кейин “бахтли давлат”га айланганини айтганди. Унинг сўзларига кўра, 2026 йил январида Николас Мадуро ҳибсга олинганидан кейин вазият кескин яхшиланган.