Ван Дамм одам савдосида айбланмоқда

Руминияда актёр Жан-Клод Ван Дамм одам савдоси тармоғида, жумладан, вояга етмаганлар савдосига иштирок этганликда айбланди. Бу ҳақда “Libertatea” хабар берди.

Маълум қилинишича, терговни Руминия уюшган жиноятчиликка қарши курашиш прокуратураси олиб бормоқда. Иш 26 ёшли мамлакат фуқаросининг аризасига кўра очилган, у ўн йил олдин Франциянинг Канн шаҳрида актёр томонидан эксплуатация қилинганини даъво қилмоқда.

Йигит баёнотда у ёлғиз эмаслигини, бошқа бир гуруҳ қизларни ҳам “актёрга беришганини” ва воқеа жойида бўлганлар бу ҳақда билишганини айтган.

Жабрланувчининг адвокати Адриан Кукулиснинг айтишича, артист ўн йил аввал Францияда бўлган вақтида келиб чиқиши руминиялик бўлган беш нафар қизнинг жинсий хизматидан фойдаланган. Ҳуқуқшуноснинг сўзларига кўра, Ван Даммга қарши жиноий иш учта банд бўйича очилган:

• Руминия Жиноят Кодексининг 182-моддаси (эксплуатация қилинаётган шахс хизматларидан фойдаланиш)
• 367-моддаси (жиноий уюшма ташкил этиш)
• 210-моддаси (одам савдоси)

“Hotnews” портали маълумотларига кўра, актёр учун қизларни руминиялик тадбиркор ва моделлик агентлиги эгаси Морель Боля танлаган. 2022 йилда у вояга етмаганлар савдосида айбланган. Тергов маълумотларига кўра, тадбиркор ўзининг моделлик агентлиги орқали қизларни “руҳий зўравонлик билан жинсий эксплуатация қилиш” фаолиятига жалб қилган.

Нашрнинг эслатишича, бу бельгиялик актёрнинг жинсий зўравонликда айбланган биринчи ҳолати эмас. 2022 йилда Бельгия прокуратураси 2021 йил август ойида Брюссель барида содир бўлган воқеа ҳақидаги шикоятдан сўнг унга қарши тергов бошлаган. Ўшанда 33 ёшли аёл актёр унга жинсий алоқа қилишни таклиф қилиб, ҳужум қилмоқчи бўлганини айтган. Полиция иш қўзғатган, Жан-Клод Ван Дамм айбловларни рад этган.

Маълумот учун, Жан-Клод Ван Дамм 80-90 йилларда жангари фильмлардаги роллари билан танилган. У Бельгияда ўрта синф оиласида туғилган. Ёшлигида Жан-Клод карате бўйича Европа чемпиони бўлди ва жанг санъатининг бошқа кўплаб турларини забт этган, бу эса унга кино оламига эшикларни очган. У “Қонли спорт” ва “Универсал аскар” каби фильмларнинг юлдузига айланган.

Актёрнинг шахсий ҳаёти, айниқса, унинг кўплаб никоҳлари ҳам маълум. “Starhit” нашрининг ёзишича, Жан-Клод беш марта уйланган.