“Валенсия Баскет” Исроил клубига қарши ўйинга чипта сотмасликни кўриб чиқмоқда

Испаниянинг “Валенсия Баскет” баскетбол жамоаси 15 октябрь куни Евролига доирасида “Ҳапоэл Тель-Авив”га қарши ўйинда чипталар сотишни тўхтатиш масаласини кўриб чиқмоқда. Бу ҳақда AS нашри хабар берди.

Клуб бош директори Энрик Карбонел матбуот анжуманида бу борада ҳали якуний қарор қабул қилинмаганини маълум қилди.

“Ўтган мавсумда биз хавфсизликни таъминлаш учун чипталарни сотмасликка қарор қилган эдик. Шунда ҳеч ким баскетболдан завқланишдан бошқа мақсадда келмасди. Ҳозир ҳам шунга ўхшаш вазиятни кўриб чиқяпмиз”, дейди Карбонел.

Бош директорнинг сўзларига кўра, “Валенсия Баскет” яқинда Испанияда бўлиб ўтган “Ла Вуэлта” пойгасида Исроил жамоасига қарши норозилик намойишлари фонида эҳтиёт чораларини кучайтирган. Шу сабабли, клуб Евролига ва Испания ҳукуматининг минтақавий делегацияси билан музокараларни жадаллаштирган.

“Биз 15 октябрь куни Исроил жамоасини қабул қиладиган дастлабки клубларданмиз. “Манреса” ҳам худди шундай ҳолатда. Шу боис, иккала клуб ўртасида яқин мулоқот олиб бориляпти”,  дея қўшимча қилди Карбонел.

Эслатиб ўтамиз, аввалроқ Индонезия ҳукумати гимнастика бўйича Жакартада бўлиб ўтадиган Жаҳон чемпионати учун Исроил спортчиларига виза бермаслигини маълум қилган эди.