Вальверде жанжалдаги жароҳати сабаб “Эль-Класико”ни ўтказиб юборади

“Реал Мадрид” клуби ярим ҳимоячи Федерико Вальверде тиббий кўрикдан ўтгани ва унда бош мия жароҳати аниқлангани сабаб “Эль-Класико”ни ўтказиб юборади. Бу ҳақда клуб матбуот хизмати хабар берди.

Клуб баёнотига кўра, футболчининг аҳволи қониқарли, бироқ тиббий протоколларга мувофиқ у 10-14 кун давомида дам олиши керак бўлади. Шу сабабли уругвайлик футболчи жорий йилнинг 10 май куни “Камп Ноу” стадионида бўлиб ўтадиган “Эль-Класико” учрашувини ўтказиб юборади. “Барселона” учун ушбу баҳс чемпионлик ўйини ҳисобланади – каталонияликларга Испания чемпионлигини қўлга киритиш учун атиги бир очко кифоя қилади.

Маълумотларга кўра, Федерико Вальверде ушбу жароҳатни жамоадоши Орельен Тчуамени билан юз берган можаро пайтида олган. ОАВ хабарларига кўра, футболчилар ўртасидаги кескинлик икки кун давом этган.

Маҳаллий нашрларнинг ёзишича, дастлабки можаро жорий йилнинг 6 май куни машғулот вақтида юз берган. Футболчилар ўртасида тортишув келиб чиқиб, улар бир-бирини итариб юборган. Бунга франциялик футболчининг қўполлиги сабаб бўлган.

Кейинги куни эса уругвайлик футболчи жамоадошининг қўлини сиқишдан бош тортган ва машғулот давомида унга нисбатан бир неча марта кескин ҳаракат қилган. Можаро кейинчалик кийиниш хонасида давом этган ва ўша ерда Орельен Тчуамени Вальвердени уриб юборгани, футболчи йиқилиб бошидан зарба олгани айтилмоқда.

“The Touchline” ва “El Chiringuito” маълумотларига кўра, Федерико Вальверде бир неча сонияга ҳушини йўқотган ва кейинчалик қисман хотира йўқотиши кузатилган. Футболчига чок қўйилган ҳамда қўшимча текширувлар учун шифохонага олиб кетилган.

Бироқ Федерико Вальверде ушбу воқеаларни рад этиб, Тчуамени билан машғулотларда тортишиб қолганини, аммо жараён муштлашувгача етиб бормаганини айтиб ўтди. 

“Реал Мадрид” эса ушбу воқеа юзасидан ҳар икки футболчига нисбатан интизомий тергов бошлаган. Хабарларга кўра, футболчилар учдан йигирматагача ўйинга дисквалификация қилиниши, шунингдек маошидан ушлаб қолиниш эҳтимоли мавжуд.

Маълумот учун, Ла Лиганинг 34-туридан сўнг “Барселона” 88 очко билан турнир жадвалида етакчилик қилмоқда. “Реал Мадрид” эса 77 очко билан иккинчи ўринда бормоқда.