Вэнс Эрон билан урушни тугатиш шартини айтди

Эрон АҚШ билан урушни тугатиш учун уранни бойитиш қувватларини сезиларли даражада қисқартириши керак. Бу ҳақда АҚШ вице-президенти Жей Ди Вэнс “Reuters”га берган интервьюсида маълум қилди.

Унинг айтишича, агар Эрон ядро қуролини яратишни истамаса, 60 фоизгача бойитилган уран ишлаб чиқаришига эҳтиёж йўқ.

“Агар сиз ядро қуролини истамасангиз, унда нега 60 фоизгача бойитилган ёқилғи керак? Агар ядро қуроли яратмасликка содиқлигингизни кўрсатмоқчи бўлсангиз, юқори даражада бойитилган ёқилғи ишлаб чиқарманг”, деган Вэнс.

У Вашингтон Эрон билан келишув тузишга очиқ эканини, бироқ Теҳрондан ядровий дастур бўйича аниқ ён беришларни кутаётганини билдирган.

“Биз сўзларни амалий ҳаракатларга алмаштирмоқчи эмасмиз”, деган АҚШ вице-президенти.

Вэнснинг билдиришича, музокараларни Эрон бўйича қарорларни айнан ким қабул қилаётгани ноаниқлиги ҳам қийинлаштирмоқда. АҚШ Эрон Президенти Масъуд Пезешкиён ва Ташқи ишлар вазири Аббос Ароқчи билан музокара олиб бормоқда. Бироқ Вэнс уларнинг мамлакат ҳокимияти тизимидаги таъсири қанчалик катта эканига аниқлик йўқлигини айтган.

Сентябрь ойи охирида “Axios” нашри Эрон ва АҚШ ўртасидаги Қатар воситачилигидаги музокаралар боши берк кўчага кириб қолгани ҳақида ёзганди. Музокараларда АҚШнинг Эрон денгиз блокадасини бекор қилиши эвазига Теҳроннинг ядровий дастур бўйича ён бериши муҳокама қилинган.

Эслатиб ўтамиз, аввалроқ АҚШ билан музокаралардаги бош вакили Муҳаммад Боқир Ғолибоф Эрон Ҳормуз бўғозини АҚШ билан келишилган етти шарт бажарилмагунча очмаслигини маълум қилган эди.