Суддан яширинган Денов тумани жиноят суди собиқ раиси қидирувга берилди

Жиноят ишлари бўйича Қарши шаҳар суди Жиноят ишлари бўйича Денов туман судининг собиқ раиси Камолиддин Муродовга қамоқ эҳтиёт чорасини қўллаш ва қидирув эълон қилиш ҳақида ажрим чиқарди. QALAMPIR.UZ суд ҳужжати билан танишди.

Унга кўра, Жиноят кодексининг 266-моддаси 2-қисми (Транспорт воситаларидан фойдаланиш хавфсизлиги қоидаларини бузиш одам ўлимига сабаб бўлиши) билан айблаётган Камолиддин Муродов огоҳлантирилишига қарамай навбатдаги суд мажлисига келмаган. 13 декабрда уни судга мажбурий келтириш бўйича ажрим эълон қилинган.

Муродов ўзининг доимий яшаш манзили бўлган Самарқанд вилоятининг Самарқанд шаҳри “Ўрикзор” МФЙдаги уйида йўқлиги аниқланган. Маҳалла раиси ва ходимлари томонидан 2024 йил 13 декабрь куни тузилган далолатномада Камолиддин Муродов даволанаётганлиги сабабли хонадонида йўқлиги келтирилган. Шу билан бирга, судланувчи Муродов ва унинг ҳимоячи адвокатлари томонидан суд мажлисини бошқа кунга қолдириш ёки собиқ судьянинг соғлиғи ёмонлашганини тасдиқловчи ҳужжатлар судга тақдим қилинмаган.

Суд, судланувчи Муродов номаълум томонга кетиб қолгани, ушбу жиноят ишини унинг иштирокисиз кўриб, мазмунан ҳал қилиш имконияти йўқлиги сабаб унга нисбатан қидирув эълон қилган.

Муродов қидириб топилгандан сўнг, унга нисбатан дастлабки тергов органи томонидан қўлланган муносиб хулқ-атворда бўлиш ҳақидаги тилхат эҳтиёт чораси ўзгартирилиб, қамоққа олиш ҳамда уни Қарши шаҳридаги 5-сонли тергов ҳибсхонасига этап қилиш белгиланган. Судланувчи собиқ судья қидириб топилгунга қадар унга нисбатан кўрилаётган жиноят иши ҳаракатдан тўхтатилган.

Жиноят ишлари бўйича Денов тумани судининг собиқ раиси Камолиддин Муродов ЙТҲга учраб, оғир тан жароҳатлари олганди. Воқеа дам олиш куни – жорий йилнинг 9 мартида содир бўлган. Автомобиль бошқарувида бўлган суд раисининг адвокат таниши эса вафот этганди.

Маълумот учун, Камолиддин Муродов 2021 йилнинг апрель ойида 5 йил муддатга Денов тумани жиноят ишлари бўйича суд раиси лавозимига тайинланган эди.