Ўзғур Ўзел янги партия тузишини эълон қилди

Туркиянинг асосий мухолифатдаги Жумҳурият халқ партиясининг (CHP) суд қарори билан лавозимидан четлатилган собиқ раиси Ўзғур Ўзел партиядан расман чиқиши ва янги сиёсий партия тузаётганини маълум қилди. Бу ҳақда у бугун, 21 июль куни парламентдаги партия депутатлари олдида қилган нутқида сўз очди.

“Бугун биз қайғули, аммо муқаррар ва вақти келган хайрлашув арафасида турибмиз. Бироқ халқимизга шуни айтмоқчимизки, биз янги бошланиш умидини ўзимиз билан олиб кетяпмиз”, деган Ўзғур Ўзел парламентдаги чиқишида.

Шунингдек, у янги партия тузилаётганини эълон қилган ва эртагаёқ биринчи қадам ташланишини билдирган.

“Биз янги партия тузмоқдамиз. Барча техник процедуралар якунлангач, янги сиёсий кучни расман таъсис этамиз. Эртагаёқ биринчи қадамни ташлаймиз. Бугун ушбу минбар билан хайрлашар эканмиз, биз асло бош мухолифат партиясининг минбарини тарк этаётганимиз йўқ”, дейди у.

Маълумот учун, жорий йилнинг май ойида Туркия суди Жумҳурият халқ партиясининг 2023 йилги қурултойини ҳақиқий эмас деб топган эди. Ўша қурилтойда Ўзғур Ўзел партия раиси этиб сайланган бўлиб, суд қарорда сайлов жараёнида қонунбузарликлар бўлганини асос қилиб кўрсатган.

Шундан сўнг, суд қарори билан партиянинг собиқ раҳбари, 2023 йилги президентлик сайловида Ражаб Тойиб Эрдўғанга мағлуб бўлган Камол Қиличдорўғли яна ЖХП раиси лавозимига тикланган.

Турли хориж ОАВларига кўра, бу қарор Эрдўған мухолифларига қарши мисли кўрилмаган босим кучайган бир пайтда қабул қилинган.

Эслатиб ўтамиз, 2025 йилнинг август ойида Эрдўған Туркиядаги асосий мухолифат Ўзғур Ўзелга қарши 1 миллион турк лираси (тахминан 24,5 минг АҚШ доллари) миқдорида маънавий зарар тўлаш талаби билан судга даъво аризаси берган эди. Мамлакат раҳбари бунга сабаб қилиб Ўзелнинг Истанбулдаги митингда март ойида коррупция айблови билан ҳибсга олинган Экрем Имомўғлининг қамоққа олиниши учун айбни Эрдўғанга юклаганини келтирган.