Эрдўған мухолифат раисини судга берди

Туркия Президенти Ражаб Тойиб Эрдўған Туркиядаги асосий мухолифат – Жумҳурият халқ партияси (CHP) раиси Ўзғур Ўзелга қарши 1 миллион турк лираси (тахминан 24,5 минг АҚШ доллари) миқдорида маънавий зарар тўлаш талаби билан судга даъво аризаси берди. Бу ҳақда “Hurriyet” хабар берди.

Қайд этилишича, у Ўзелни ҳақорат қилишда айблаб, маънавий зарар учун 1 миллион турк лираси миқдорида товон талаб қилмоқда. 

Нашрга кўра, 13 август куни Ўзғур Ўзел томонидан Президентга нисбатан айтилган ноўрин гаплар ва асоссиз айбловлар сабабли Анқаранинг биринчи инстанция фуқаролик судига маънавий зарар учун товон ундириш бўйича даъво аризаси топширилган. Шунингдек, Анқара бош прокуратурасига Президентни ҳақорат қилиш жинояти юзасидан ариза берилган.

Ўзел 13 август куни Истанбулдаги митингда март ойида коррупция айблови билан ҳибсга олинган Экрем Имамўғлининг қамоққа олиниши учун айбни Эрдўғанга юклаган.

Эрдўған аввал ҳам партия раҳбарига қарши бир неча бор суд даъволарини берган. Туркия қонунчилигига кўра, Президентни ҳақорат қилиш жиноят ҳисобланади.

Эслатиб ўтамиз, аввалроқ Истанбулда номаълум шахс Ўзғур Ўзелга Отатурк маданият марказидаги хотира тадбиридан чиқиб кетаётганда мушт туширганди.