Ўзбекистоннинг рақиби ЖЧ олдидан жиддий муаммога дуч келмоқда

Ўзбекистон терма жамоаси билан бир гуруҳдан жой олган Конго Демократик Республикаси терма жамоасининг мухлисларига 2026 йилги Жаҳон чемпионати учун АҚШга кириши тақиқланиши мумкин. Бу ҳақда CNN хабар берди.

Манбага кўра, АҚШ Эбола вирусига қарши кучайтирилган санитария чораларини жорий қилган. Мамлакат Уганда, Конго Демократик Республикаси ёки Жанубий Суданга ташриф буюрган хорижий фуқароларнинг мамлакатга кириши чеклаши мумкин. Ҳатто ушбу тақиқ 2026 йилги Жаҳон чемпионатидан олдин бекор қилинган тақдирда ҳам конголик мухлислар ўйинларга бора олмаслиги эҳтимоли юқори. Чунки улар АҚШга борганидан кейин бир неча ҳафта давомида изоляция ва карантин талабларига риоя қилишига тўғри келади.

Маълумот учун, КДР Жаҳон чемпионатини жорий йилнинг 17 июнь куни Португалияга қарши учрашув билан бошлайди. Африка қитъаси вакилларининг Ўзбекистон терма жамоаси билан учрашуви гуруҳ босқичининг 3-турида бўлиб ўтади. Ушбу баҳс жорий йилнинг 28 июнь кунига белгиланган.

Эслатиб ўтамиз, аввалроқ КДР терма жамоаси мундиаль учун қайдномасини эьлон қилганди.