Ўзбекистоннинг гуруҳда қолиб кетиш эҳтимоли юқори – МТЖ собиқ устози

Ўзбекистон миллий терма жамоаси Жаҳон чемпионатининг гуруҳ босқичида қолиб кетиш эҳтимоли юқори, аммо битта ўйинда кучли натижа қайд этиши мумкин. Бу ҳақда Ўзбекистон терма жамоалари собиқ мураббийи Валерий Непомняший РИА Новостига берган интервьюсида сўз очди. 

“Ўзбекистон терма жамоасининг имкониятлари катта деб ўйламайман, аммо улар кутилмаган натижа қайд этиши ва кучли рақибларга қийинчилик туғдириши мумкин. Гуруҳдан чиқишига шубҳам бор”, дейди Непомняший.

Унинг айтишича, Португалия ва Колумбия кейинги босқичга чиқиш учун асосий номзодлар ҳисобланади.

“Ўзбекистон учун Жаҳон чемпионатига чиқишнинг ўзи катта ютуқ. Албатта, кутилмаган натижалар бўлиши мумкин, аммо менинг фикримча, улар гуруҳда учинчи ўринни эгаллашлари эҳтимоли бор”, дея қўшимча қилган мутахассис.

Ўз тарихида илк бор Жаҳон чемпионатида иштирок этаётган Ўзбекистон терма жамоаси жорий йилнинг 18 июнь куни Колумбия терма жамоасига қарши Жаҳон чемпионатидаги дастлабки учрашувини ўтказади. Ушбу баҳс Тошкент вақти билан тонги соат 07:00 да Мексикадаги “Ацтека” стадионида бўлиб ўтади. Шундан сўнг, терма жамоа 23 июнь куни Португалия билан, 27 июнь куни эса Конго Демократик Республикаси билан баҳс олиб боради.

Маълумот учун, Валерий Непомняший 2006 йилда Ўзбекистон миллий терма жамоаси бош мураббийи бўлган. Унинг қўл остида терма жамоа 6 та ўйин ўтказиб 3 та ғалаба 2 та дуранг ва 1 та мағлубият қайд этган.