Ўзбекистонлик тадбиркор АҚШнинг “қора рўйхат”ига тушди 

АҚШ санкциялари рўйхатига Ўзбекистон фуқароси Азизжон Мамашов ва унинг Бирлашган Араб Амирликларида рўйхатдан ўтган компанияси – Advanced Security Solution киритилди. Бу ҳақда кеча, 24 февраль куни АҚШ Хорижий активларни назорат қилиш идорасининг расмий сайтида сўз боради.

АҚШ расмийларининг маълум қилишича, Мамашов уч нафар россиялик хакер билан ҳамкорликда АҚШ мудофаа сектори учун мўлжалланган “ноль-дай” эксплуатация воситаларини ўғирлаш ва уларни ноқонуний сотиш билан шуғулланган. “Ноль-дай” эксплуатациялари – дастурий таъминотдаги илгари аниқланмаган заифликлардан фойдаланишга мўлжалланган воситалар бўлиб, улар аниқланмагани сабабли ҳам хавфли ҳисобланади.

Расмий баёнотга кўра, ўғирланган кибервоситалар кейинчалик учинчи томон тузилмаларига қайта сотилган. АҚШ томони бу ҳаракатлар мамлакатнинг миллий хавфсизлиги ҳамда иқтисодий манфаатларига жиддий таҳдид солганини таъкидламоқда.

АҚШ Давлат департаменти маълумотига кўра, санкциялар киберҳужумлар, бузғунчилик, ахборот тизимларига ноқонуний аралашиш, кибержосуслик ва тижорат сирларини ўғирлаш билан боғлиқ фаолиятларда иштирок этган шахслар ва ташкилотларга нисбатан қўлланади.

Эслатиб ўтамиз, аввалроқ АҚШ Давлат департаменти Ўзбекистонда АҚШга ноқонуний иммиграцияни била туриб ташкиллаштиришда иштирок этган шахсларга нисбатан виза чекловларини қўллаш чораларини кўрганди. Бу чоралар Ўзбекистонда жойлашган иккита виза хизматлари компаниясининг раҳбарлари ва юқори лавозимдаги масъул ходимларига тааллуқли бўлиб, улар АҚШга ноқонуний кўчиб ўтишни режалаштирган шахслар учун асосан шу мақсадга қаратилган саёҳат хизматларини кўрсатгани аниқланган.