Ўзбекистонлик қиличбоз қизлар Осиё чемпионатини 6 та медал билан якунлади

Қиличбозлик бўйича Ўзбекистон аёллар терма жамоаси Қувайтда ўтган Осиё чемпионатида 5 та олтин ва 1 та бронза медалга эга чиқди. Бу ҳақда Ўзбекистон қиличбозлик федерацияси матбуот хизмати хабар берди.

Манбага кўра, Қувайт 19 февралдан 28 февралга қадар қиличбозлик бўйича ёшлар ўртасида Осиё чемпионатига мезбонлик қилди. Мусобақанинг сўнгги кунида жамоавий баҳслар ва саблья йўналишларида ғолиб ва совриндорлар аниқланди. Ушбу баҳсларда ўзбекистонлик қиличбоз қизлар жамоавий ва саблья йўналишларда олтин медалга сазовор бўлди. Шпага йўналишида Азиза Ҳамидова, Дилноз Муртазоева, Санам Назарова ҳамда Бибимарям Сапаровадан иборат квартет мусобақа давомида Иордания, Сингапур, Хитой Тайпейи ва Япони вакилларини мағлубиятга учратди. 

Саблья йўналишида Гулистон Пердибаева, Фернанда Эррера, Самира Шокирова ҳамда Аякўз Жумамуротовадан иборат квартет Сингапур, Корея Республикаси ва Гонгконг вакилларидан устун келди.

Шу тариқа, мусобақада 5 та олтин ва 1 та бронза медаль қўлга киритган Ўзбекистон аёллар терма жамоаси умумжамоа ҳисобида биринчи ўринни эгаллади.