Ўзбекистондаги “ГАИ”ларни ҳақоратлаган шахс узр сўраб чиқди

Жорий йилнинг 17 май куни ижтимоий тармоқларда шахси номаълум фуқаро томонидан барча ЙПХ инспекторларини ҳақорат қилиб, сўккан видеолавҳа тарқалди. Ҳолат юзасидан вилоят Ички ишлар бошқармаси Ахборот хизмати изоҳ берди.

Таъкидланишича, шахси номаълум бўлган эркак Хоразм вилоятининг Ҳазорасп туманида яшовчи фуқаролар ва Ўзбекистондаги барча ЙПХ ходимларини сўккан. Хоразм вилояти ИИБ томонидан олиб борилган суриштирув ишлари натижасида ушбу фуқаронинг шахсига аниқлик киритилган.

“Ҳозирда ушбу шахснинг хатти-ҳаракатлари юзасидан терговга қадар текширув олиб борилмоқда”, дейилади хабарда.

Шунингдек, эркакнинг ҳақоратлаган видеоси тарқалганидан кейин маълум вақт ўтгач, унинг узр сўрагани акс этган видео ҳам тарқалди. Хоразм вилояти ИИБ Матбуот хизмати мазкур видео эркакнинг ўзи томонидан олингани, яъни ИИБ биносига олиб келинганидан кейин олинмаганини маълум қилди.

Нурмуҳаммад Файзуллаев