Ўзбекистонда тадбиркорларга бизнесини вақтинча тўхтатиб туриш ҳуқуқи берилади

Ўзбекистонда тадбиркорлик субектларига ўз ташаббуси билан бизнес фаолиятини вақтинча тўхтатиб туриш ҳуқуқи берилди. Расман фаолиятини тўхтатган корхоналар ва уларнинг ёлланма ходимларига нисбатан солиқлар ҳисобланиши тўхтатилади. Бу ҳақда “Ўзбекистон Республикасининг айрим қонун ҳужжатларига тадбиркорлик фаолияти эркинлигининг кафолатларини мустаҳкамлашга ҳамда тадбиркорлик субъектларини қўллаб-қувватлаш механизмларини такомиллаштиришга қаратилган қўшимча ва ўзгартиришлар киритиш тўғрисида”ги қонунда белгиланган.

Ушбу ҳужжатга мувофиқ, тадбиркорлик субъекти мулкдорнинг ўз аризаси асосида фаолиятини вақтинча тўхтатиши мумкин бўлади. Бунинг учун рўйхатдан ўтказувчи органга мурожаат қилиш ёки тадбиркорлик субъектларини давлат рўйхатидан ўтказиш ва ҳисобга қўйишнинг автоматлаштирилган тизимидан фойдаланиш талаб этилади.

“Тадбиркорлик фаолияти эркинлигининг кафолатлари тўғрисида”ги қонунга киритилган янги 42-1-моддага кўра, тадбиркорлик субъектининг фаолияти вақтинча тўхтатилгани ҳақидаги маълумотлар солиқ органларига автоматик равишда юборилади.

Бунда рўйхатдан ўтказувчи тегишли орган маълумотларни ариза келиб тушганидан кейинги иш куни якунигача солиқ органларига тақдим этиши шарт.

Шунингдек, ҳужжат билан тадбиркорлик субъекти ўз фаолиятини расман тўхтатган даврда солиқ ва статистика ҳисоботларини топширмайди. Шунингдек, корхонанинг ўзига ва унинг ҳар бир ёлланма ходимига нисбатан солиқлар ҳисобланиши тўхтатилади. Бизнес фаолиятини қайта тиклаш ҳам худди шу тартибда амалга оширилади. Бунинг учун тадбиркор рўйхатдан ўтказувчи органга ариза бериши ёки автоматлаштирилган тизимдан фойдаланиши мумкин.

Бундан ташқари, мазкур қонун билан назорат қилувчи органларнинг тадбиркорлик фаолиятини мажбурий тўхтатиб туриш ваколатларига ҳам чекловлар киритилган. Унга кўра, назорат органлари бизнес фаолиятини фақат одамларнинг ҳаёти ва соғлиғига юқори даражада хавф туғдирадиган омиллар мавжуд бўлган тақдирда кўпи билан 10 иш кунига тўхтатиши мумкин.

Фаолиятни 10 иш кунидан ортиқ, бироқ олти ойдан ошмаган муддатга тўхтатиб туришга фақат суд қарори асосида йўл қўйилади. 

Мазкур қонун Олий Мажлис Қонунчилик палатаси томонидан жорий йилнинг 14 июлда қабул қилинган, Сенат томонидан эса 8 августда маъқулланган эди. Энди ҳужжат расман эълон қилинганидан уч ой ўтиб, яъни 18 ноябрдан кучга киради.