Ўзбекистон U-23 терма жамоаси 2026 йилги Осиё Кубогига йўл олди

Ўзбекистон U-23 терма жамоаси Осиё Кубоги саралашининг “E” гуруҳида иккинчи ўринни қўлга киритди ва 2026 йилги U-23 Осиё Кубогида иштирок этиш ҳуқуқини қўлга киритди. Мусобақа 2026 йил 7–25 январь кунлари Саудия Арабистонида бўлиб ўтади.

Ёшлар терма жамоаси кейинги йилларда минтақа футболида энг кучли рақиблардан бирига айланди. 2022 йилда Тошкентда ўтган чемпионатда ўз майдонида финалга қадар етиб борган Ўзбекистон Саудия Арабистонига мағлуб бўлганди. 2024 йил Қатардаги мусобақа эса тарихий аҳамият касб этди – Ўзбекистон ёшлари илк бор Олимпиада йўлланмасига эга чиқди. Шу билан бирга, финалда Японияга 0:1 ҳисобида ютқазиб, иккинчи марта кетма-кет вице-чемпионлик билан кифояланди.

Ўзбекистон ёшларининг энг ёрқин саҳифаларидан бири эса 2018 йилда ёзилган. Хитойдаги чемпионатда Вьетнам устидан қозонилган ғалаба мамлакат футбол тарихида илк бор "U-23 Осиё чемпиони" деган номни олиб келди. 

Таъкидлаш лозимки, 2026 йилги Саудияда ўтадиган чемпионат Олимпиада йўлланмаси тақсимланадиган мусобақа эмас. Бу гал асосий мақсад – қитъа миқёсидаги нуфузли соврин учун курашиш.

Жаҳонгир Болтабоев