Ўзбекистон МТЖ устози бўлишга яқин турган Бенту ўзи ким?

Аввалроқ, португалиялик 56 ёшли мутахассис Паулу Бенту Ўзбекистон миллий терма жамоасини бошқариши кутилаётгани хабар қилинган эди. Бугун, 28 август куни эса ижтимоий тармоқларда унинг Тошкентга етиб келгани ва тез орда Миллий терма жамоа бош мураббийи сифатида эълон қилиниши ҳақида хабарлар тарқалди. Хўш, Бенту фаолияти давомида қандай ютуқларга эришган ва қайси жамоаларга устозлик қилган?

Бенту профессионал футболчилик фаолиятида ярим ҳимоячи ампуласида тўп сурган. Ҳатто, у Криштиану Роналду билан биргаликда “Спортинг”да тўп тепган ва кейингроқ миллий жамоада унга устозлик ҳам қилган.

Ушбу мутахассис мураббийлик фаолиятини 2004 йилда Португалиянинг “Спортинг” клуби, ёшлар жамоасида бошлаган. Орадан 1 йил ўтиб, 2005 йилда клубнинг асосий жамоаси бош мураббийига айланган. 2007-2008 йилларда эса “Спортинг” билан 2 маротаба Португалия кубоги ва Суперкубоги ғолиблигини қўлга киртиган. 

Бундан ташқари, Бенту 2016 йилнинг 11 майида Бразилиянинг “Крузейро” клуби бош мураббийи этиб тайинланган. Шартнома 2017 йилнинг декабригача имзоланган. У “Крузейро” тарихидаги хорижлик учинчи, европалик биринчи мураббийга айланган. Бироқ 2016 йилнинг 25 июль куниёқ Бенту “Спорт Ресифи”дан учралган мағлубиятдан сўнг жамоа бош мураббийлигидан кетган.

Шундан сўнг, у 2016 йилнинг 11 августида Грециянинг “Олимпиакос” жамоаси билан 2 йиллик шартнома имзолаган ва 1 йил ўтиб, 2017 йилда мамлакат чемпионига айланган. Шу билан бирга, Бенту Хитойнинг “Лифан” клубида ҳам бир муддат – 2017/2018 йилги мавсумда ишлаган ва жамоанинг атиги 15та ўйинига бош мураббийлик қилган.

У Португалия, Жанубий Корея ва Бирлашган Араб Амирликлари миллий терма жамоаларини турли йилларда бошқарган.

Бенту 2010 йилнинг 21 сентябрь куни Португалия терма жамоаси бош мураббийи этиб тайинланган. Шундан сўнг, бу лавозимда 4 йил фаолият олиб борган. Унинг бошчилигида португаллар 47 та ўйинда 26 ғалаба, 11 дуранг, 10 мағлубият қайд этган. Евро-2012 турнирида ярим финалгача етиб борган ва пенальтилар сериясида Испанияга енгилган. Шу тариқа мусобақанинг бронза медалига эга чиққан.

У Португалия билан 2014 йил Бразилия мезбонлик қилган мундиалда гуруҳ босқичида Германияга 0:4 ҳисобида енгилган, АҚШ билан дуранг ўйнаган – 2:2 ва Ганани 2:1 ҳисобида таслим қилган. АҚШ билан бир хил 4 очко тўплаган Португалия тўплар нисбатига кўра гуруҳда қолиб кетган.

2022 йил Жанубий Корея устози сифатида Қатарда ўтган Жаҳон чемпионатида қатнашган. Худди 2014 йилдаги каби 4 очко жамғарган кореяликлар Уругвай билан дуранг (0:0), Ганага мағлубият (2:3), Португалияни мағлуб қилган (2:1). Нимчорак финалда эса Бразилияга (1:4) имкониятни бой берган.

Бенту Жанубий Корея билан 57 та ўйинда 35 та ғалаба, 13 та дуранг, 9 та мағлубият қайд этган. Бирлашган Араб Амирликлари терма жамоасида эса 26 та ўйинда 14 ғалаба, 5 дуранг, 7 мағлубият билан жамоани тарк этган.

Қайд этиш жоиз, ўтган йилнинг 15 октябрь куни Бенту БАА бош мураббийи сифатида Жаҳон чемпионатининг саралаш босқичи доирасида Ўзбекистон миллий терма жамоасига 1:0 ҳисобида мағлуб бўлган. Тошкентда ўтган учрашувда ягона голга Отабек Шукуров муаллифлик қилган.