Ўзбекистон Мальтага илк элчисини юборди

Ўзбекистоннинг Мальтадаги биринчи элчиси этиб тайинланган Абат Файзуллаев (қароргоҳи Рим шаҳрида жойлашган) ушбу мамлакат Президенти Мириам Спитери Дебонога ишонч ёрлиқларини топширди. Бу ҳақда “Дунё” ахборот агентлиги хабар берди.

Тантанали тадбирдан сўнг бўлиб ўтган қисқача мулоқот чоғида Мальта етакчиси Ўзбекистон Президенти томонидан олиб борилаётган очиқ ва прагматик ташқи сиёсат натижасида икки томонлама муносабатлар фаоллашганини таъкидлади. Мамлакатлар географик жиҳатдан бир-биридан олисда жойлашган бўлса-да, ўзаро манфаатли ва кўп қиррали ҳамкорлик икки томонлама муносабатларни ривожлантиришга хизмат қилаётгани қайд этилди.

Маълумот учун, Абат Файзуллаев 2020-2023 йилларда Ўзбекистоннинг Австриядаги элчиси бўлиб ишлаган, шунингдек, Венгриядаги дипломатик миссияни ўриндошлик асосида бошқарган. У бир вақтнинг ўзида, Ўзбекистоннинг Европада хавфсизлик ва ҳамкорлик ташкилоти ҳамда Венадаги бошқа халқаро ташкилотлар ҳузуридаги доимий вакили бўлиб ишлаган.

42 ёшли дипломат Жаҳон иқтисодиёти ва дипломатия университети ҳамда Тошкент давлат иқтисодиёт университетини тамомлаган. У Ташқи ишлар вазирлиги ва Ўзбекистоннинг АҚШдаги элчихонасида турли лавозимларда ишлаган, Ташқи ишлар вазири ёрдамчиси – котибият мудири лавозимларида фаолият юритган.

Абат Файзуллаев 2023 йилнинг октябрь ойидан буён Ўзбекистоннинг Италиядаги элчиси ва Римдаги халқаро ташкилотлар (ФАО, ҚХРХЖ, БООД) ҳузуридаги доимий вакили ҳамда 2024 йилнинг декабрь ойидан бошлаб Ўзбекистоннинг Кипрдаги элчиси сифатида ҳам фаолият юритиб келмоқда.

Эслатиб ўтамиз, аввалроқ Ўзбекистоннинг Исландиядаги биринчи Фавқулодда ва мухтор элчиси тайинланганди.