55 метр узунликдаги шоколадли поезд Гиннесга киритилди (видео)

Мальталик машҳур шоколадчи Эндрю Фарружия узунлиги 55,27 метр бўлган шоколадли поезд ҳайкалини ясаб, Гиннеснинг рекордлар китобига кирди. Бу ҳақда жорий йилнинг 20 февраль куни ташкилот расмий сайтида хабар берилди.

Қайд этилишича, мазкур ноёб асар Олимпия сув ҳавзасидан ҳам узунроқ бўлиб, Бельгия шоколадидан тайёрланган. Шоколадли поезд бир локомотив ва 22 та вагондан иборат, унинг ҳар бир қисми 160 килограммгача тош босади.

Маълум қилинишича, ушбу рекорд устида тайёргарлик ишлари бир йил давом этган, ясаш жараёнига эса тўрт ой вақт кетган. Ҳайкални ясашда Мальта ва Италия ошпазлик мактаби талабалари ҳам иштирок этган. Жами 5000 га яқин майда деталлар қўлда ишланган. Энг мураккаб жараён бу – улкан экспонатни Миланга шикастламасдан етказиб бериш бўлган.

Маълумот учун, Эндрю Фарружия бунгача ҳам бир нечта рекордларни ўрнатган. У 2012 йилда Брюсселда 34 метрлик шоколад поезд, 2014 йилда эса Дубайда Бурж Халифа биносининг 13,5 метрлик шоколадли нусхасини ясаган.

Эслатиб ўтамиз, аввалроқ 9 ёшли Теодор Зайдер Gdansk Speedcubing League мусобақасида кубик-рубикни 2,766 сонияда йиғиб, янги рекорд эгасига айланганди.