Ўзбекистон элчиси Нидерландия қиролига ишонч ёрлиқларини топширди

Қароргоҳи Брюсселда жойлашган Ўзбекистоннинг янги тайинланган элчиси Ғайрат Фозилов 4 декабрь куни Нидерландия қироли Виллем-Александрга ишонч ёрлиқларини топширди. Бу ҳақда “Дунё” хабар берди.

Билдирилишича, маросимдан сўнг бўлиб ўтган суҳбатда Ўзбекистон ва Нидерландия ўртасидаги икки томонлама муносабатларнинг ҳолати ва истиқболлари муҳокама қилинган. Қирол Виллем-Александр Ўзбекистон Президенти Шавкат Мирзиёевга самимий саломи ва тилакларини етказган.

Қирол, шунингдек, Нидерландия ва Ўзбекистон ўртасидаги икки томонлама ҳамкорликнинг динамик хусусиятини мамнуният билан қайд этиб, турли даражадаги мунтазам сиёсий алоқалар, савдо-иқтисодий ва сармоявий ҳамкорлик фаоллашганига алоҳида эътибор қаратган.

“Нидерландиянинг мазкур тармоқлардаги бой тажрибасини ҳисобга олган ҳолда, савдо-иқтисодий ҳамкорлик, айниқса, қишлоқ хўжалиги, сув ресурсларидан самарали фойдаланиш, илғор технологиялар ва инновациялар соҳасида ўзаро манфаатли алоқаларни янада кенгайтириш масалалари муҳокама қилинди”, дейилади хабарда.

Маълумот учун, Ўзбекистоннинг Европа Иттифоқидаги миссияси раҳбари, элчи Ғайрат Фозилов 14 ноябрь куни Европа кенгаши президенти Шарль Мишелга ўзининг ишонч ёрлиқларини топширган. 2024 йил 7 февраль куни эса Ўзбекистон элчиси Ғайрат Фозиловнинг Бельгияликлар қироли Филиппга ишонч ёрлиқларини топшириш маросими бўлиб ўтган.

Эслатиб ўтамиз, аввалроқ Ўзбекистоннинг янги тайинланган элчиси Раҳматулла Нуримбетов Швеция қироли Карл XVI Густавга ишонч ёрлиқларини топширган эди.