Ўзбекистон ҳамма билан дўст бўлишни исташини очиқ-ойдин билдирди – Рубио

Ўзбекистон ҳаммага дўст бўлишни исташини очиқ-ойдин маълум қилган. Бу ҳақда бугун, 19 октябрь куни АҚШ Давлат котиби Марко Рубио Регистон майдонида журналистлар билан суҳбатда гапирди.

Журналист ундан Хитой Марказий Осиёда, жумладан, Ўзбекистонда ҳам катта ютуқларга эришаётганини, АҚШ “C5” мамлакатларига конкрет нима таклиф қила олишини сўраган. 

“Қаранг, бу рақобат, тўғрими? Бизда маҳсулотлар бор, компаниялар бор. Улар нимадир ишлаб чиқаради ва биз шунчаки ҳалол рақобат ҳамда имконият бўлишини хоҳлаймиз. Дунёда Америка ва Америка бизнеси ҳалол курашиш имкониятига эга бўлмаслиги керак деб ҳисоблайдиган бирор-бир ҳудуднинг ўзи йўқ ва биз айнан шунга интиламиз.
Гап бу ерга келиб “бошқа биров билан гаплашишни тўхтатинг” ёки “бошқа бирор мамлакат билан ишлашни тўхтатинг” дейиш ҳақида эмас. Гап бу ҳақда кетаётгани йўқ. Бу Америка бизнеси ва Америка савдоси учун ўз эшикларини очаётган дунёнинг ҳар бир бурчагида биз тайёр эканимизни, етиб келаётганимизни ва шу ерда эканимизни таъминлаш ҳақидадир. Буларнинг бари айнан шу ҳақида”, дейди АҚШ Давлат котиби.

Унинг айтишича, одамлар узоқ вақтдан бери Марказий Осиёнинг, барча бешта мамлакатнинг, хусусан Ўзбекистоннинг муҳимлигини тушуниб етган. 

“Сиз буни кўриб турибсиз. Сизлар буни бошдан кечирдинглар. Бу жуда гўзал мамлакат. Иқтисодий ўсиш ва фаровонлик нуқтаи назаридан улар сўнгги ўн йилликнинг ўзида эришган ютуқлар ҳайратланарли. Биз шунчаки биргаликда ишлашимиз мумкин бўлган соҳалардаги имкониятларни аниқлашни хоҳлаймиз, бу ерга шунинг учун келганмиз ва айнан шуни амалга оширишни истаймиз. Бу бошқа бирор-бир мамлакатга қарши қаратилган салбий ҳаракат эмас. Бу шунчаки... айтмоқчиманки, мамлакатлар имкон қадар кўпроқ алоқаларга эга бўлишни хоҳлайди”, дейди АҚШ Давлат котиби.

Бундан ташқари, унинг айтишича, Ўзбекистон ҳаммага дўст бўлишни исташини очиқ-ойдин билдирган. 

“Улар ҳамма билан муносабат ўрнатишни исташади. Улар ҳамма билан иқтисодий алоқаларга эга бўлишни хоҳлашади. Биз эса манфаатдор эканимизни айтмоқдамиз ва шу сабабли бу ерга биз билан бирга 300 га яқин Америка бизнес вакиллари ҳам келди. Улар қандай имкониятлар мавжудлигини кўришни интизорлик билан кутишмоқда ва ҳатто айримлари бироз кейинроқ эълон қиладиганимиз — келишувларни тузиб бўлишди”, дейди Рубио.

Эслатиб ўтамиз, аввалроқ Марко Рубио Самарқанддаги Регистон майдонида журналистлар олдида чиқиш қилгани ва дунёда Самарқанд каби тарихан муҳим роль ўйнаган шаҳарлар кам эканини айтгани ҳақида хабар берилган эди.