Усик қачон фаолиятини якунлайди?

Украиналик супер оғир вазн тоифасидаги мутлақ жаҳон чемпиони Александр Усик 2 та жангдан кейин фаолиятини якунлаши мумкин. Бу ҳақда боксчи “Al Arabiya English” YouTube каналига берган интервьюсида айтди.

“Ҳозир нима бўлишини билмайман, аммо ақлбовар қилмайдиган фаолиятимда яна иккита жанг қолди”, дейди Усик.

Маълумот учун, Александр Усик 38 ёшда. 2012 йилги Олимпиаданинг олтин медали соҳиби бўлган украиналик спортчи 2013 йилда профессионал боксда дебютини ўтказган. 2018 йил июль ойида Усик биринчи оғир вазн тоифасида мутлақ чемпион бўлди, шундан сўнг у супероғир вазн тоифасига ўтди.

2024 йилнинг май ойида Усик британиялик Тайсон Фюрини мағлуб этиб, супер оғир вазн тоифасида мутлақ жаҳон чемпионига айланди. Реванш декабрь ойида бўлиб ўтди ва украиналик боксчи яна очколар бўйича ғалаба қозонди.