US Open кубоги ўғирлаб кетилди

Аргентиналик собиқ теннисчи Хуан Мартин дель Потронинг уйи талон-торож қилинди ва 2009 йилги US Open кубоги ўғирлаб кетилди. Бу ҳақда “TyC Sports” нашри хабар берди.

Манбага кўра, ҳодиса жорий йилнинг 15 май куни кечаси содир бўлган. Номаълум шахслар Потро уйда бўлмаган пайтда деразани синдириб, хонадонга кирган.

Маълум қилинишича, ўғрилар теннисчининг фаолияти билан боғлиқ кубоклар, медаллар ва бошқа эсдалик буюмларини ўғирлаб кетган. Улар орасида 2009 йилги US Open кубоги ҳам бўлган. Терговчилар фикрича, жиноят пухта режалаштирилган бўлиб, гумондорлар уйнинг жойлашуви ва унда яшовчиларнинг кундалик тартиби ҳақида олдиндан маълумотга эга бўлган. Талончилик вақтида уйда ҳеч ким бўлмаган.

Маълумот учун, 37 ёшли Хуан Мартин дель Потро қатор жароҳатлар сабабли 2022 йилда профессионал фаолиятини якунлаган эди. У US Open’нинг 2009 йилги ғолиби, шунингдек 2016 йилги Олимпия ўйинлари кумуш ва 2012 йилги Олимпиада бронза медали совриндори ҳисобланади.

Дель Потронинг ATP рейтингидаги энг юқори натижаси 2018 йилда қайд этилган учинчи ўрин бўлиб, у фаолияти давомида ATP турнирининг яккалик баҳсларида 22 та чемпионликни қўлга киритган.