Украиналик спортчи махсус дубулға учун Олимпиадан четлатилди (видео)

Қишки Олимпия ўйинлари арафасида украиналик скелетончи Владислав Гераскевич Россия босқини пайтида ҳалок бўлган украиналикларнинг суратлари акс эттирилган дубулғадан фойдалангани учун мусобақалардан четлаштирилди. Бу ҳақда Олимпиада матбуот хизмати хабар берди.

Маълум қилинишича, Гераскевич қоидалар талабига жавоб бермайдиган дубулға кийиш ниятида бўлган ва уни алмаштиришдан бош тортган. Шу сабабли Халқаро Бобслей ва скелет федерацияси (IBSF) ҳакамлар ҳайъати унинг жиҳози регламентга мос келмаслиги ҳақида қарор чиқарган. Натижада спортчи Қишки Олимпия ўйинларидаги стартларда қатнаша олмайдиган бўлган.

“ХОҚ афсус билан унинг ўйинлар учун аккредитациясини бекор қилишга қарор қилди. ХОҚ ва жаноб Гераскевич ўртасида кўплаб суҳбатлар ва шахсий учрашувлар бўлиб ўтди, уларнинг энг сўнггиси ХОҚ президенти билан ўтказилди, бироқ у ҳеч қандай муросани қабул қилмади”,  дейилади ташкилот баёнотида.

Гераскевич кийишни режалаган дубулғада Россия босқини пайтида ҳалок бўлган украиналикларнинг суратлари акс эттирилган. Улар орасида оғир атлетикачи Алина Перегудова, боксчи Павел Ишенко, хоккейчи Алексей Логинов, актёр ва спортчи Иван Кононенко, сувга шўнғиш бўйича мураббий Никита Козубенко, мерган Алексей Хабаров, гимнастикачи Даря Курдел ва бошқа ватандошлар бўлган.

Спортчи ХОҚ қарорига рози эмаслигини билдирган.

“Менинг режам – бу дубулғани барча машғулотларда ва мусобақа кунида кийиш эди. Мен ХОҚ қарорига қўшилмайман, чунки биз ҳеч қандай қоидани бузмадик. Сиёсий ташвиқот, камситиш ёки ирқчилик бу ерда йўқ”, дейди Гераскевич.

Маълумот учун, бу Гераскевичнинг учинчи Олимпиадаси ҳисобланади. У 2018 йилги ўйинларда 12-ўринни, 2022 йилда эса 18-ўринни эгаллаган.