Украинада спикерни отиб ўлдиришда айбланган гумондор қўлга олинди

Аввалроқ Украинанинг Львов шаҳрида мамлакат Олий Радасининг собиқ спикери Андрей Парубий отиб ўлдирилган эди. Украина Бош прокуратураси Парубийни ўлдиришда 52 ёшли львовлик эркакни айблади. Бу ҳақда BBC хабар берди.

Расмийларга кўра, қўлга олинган шахсга қасддан одам ўлдириш ва қуролни ноқонуний сақлаш моддалари билан айблов эълон қилинган. Прокуратура уни ҳеч қандай гаровсиз қамоқда сақлашни сўрамоқда.

Парубий 30 август куни отиб ўлдирилган эди. Унга камида етти марта ўқ узилгани, ҳужумчи эса курьер ниқобида бўлгани айтилмоқда. У шахсини яшириш учун шлемдан фойдаланган ва камералар орқали уни танишнинг имкони бўлмаган. 

Ички ишлар вазири Игорь Клименко жиноятнинг пухта режалаштирилгани, марҳумнинг ҳаракат йўналиши олдиндан ўрганилганини маълум қилган. Гумондор Хмельницкий вилоятида қўлга олинган ва дастлабки кўрсатмаларни берган.
Марҳумнинг ҳамкасблари фикрича, қотиллик унинг сиёсий фаолияти билан боғлиқ бўлиши мумкин. Баъзилар бу иш ортида “Россиянинг қўли” борлигини тахмин қилмоқда, аммо ҳозирча бу ҳақдаги аниқ далиллар топилмаган. 

Маълумот учун, Андрей Парубий 2013–2014 йиллардаги Евромайдон намойишларини ташкил этишда фаол иштирок этган. 2014 йилнинг бошида у Украина Миллий хавфсизлик ва мудофаа кенгашига раҳбарлик қилган, бироқ бир неча ой ўтгач истеъфога чиққан. 2016–2019 йилларда Парубий Украина Олий Радаси спикери лавозимини эгаллаган. У мамлакат парламентининг VI, VII, VIII ва IХ чақириқлари депутати бўлган, миллий хавфсизлик, мудофаа ва разведка қўмитасида ишлаган. 2019 йилда эса унга нисбатан ҳокимият ваколатини суиистеъмол қилиш бўйича жиноий иш очилган ва Парубий бюджет маблағларидан мақсадсиз фойдаланишда гумон қилинган.

Эслатиб ўтамиз, аввалроқ Украина Хавфсизлик хизмати (УХХ) полковниги Иван Воронич Киевда ўлдирилганди.