Украинада энди 60 ёшдан катталар ҳам урушга бориши мумкин

Энди Украинада 60 ёшдан ошган фуқаролар ҳам мамлакат Қуролли кучлари сафида шартнома асосида хизмат қилиши мумкин. Бу ҳақдаги қонунни бугун, 29 июль куни мамлакат Президенти Владимир Зеленский қабул қилди.

Қонунга кўра, ҳарбий ҳолат даврида ҳарбий бўлинма командирининг ёзма розилиги билан 60 ёшдан катта бўлган, ҳарбий-тиббий комиссия томонидан хизматга яроқли деб топилган эркаклар шартнома асосида хизматга олиниши мумкин. Ҳужжатга кўра, бундай шахслар оддий ҳарбий хизматчи, сержант, катта сержант, кичик ва катта офицер лавозимларида хизмат ўташлари мумкин.

Бу ёшдаги шартнома асосидаги хизмат муддати бир йил билан чекланади, аммо кейинчалик янги шартнома тузиш имкони бор. Офицерлар эса фақат Украина Қуролли кучлари Бош штабининг розилиги билан хизмат шартномасини имзолай олади.

Қонун, шунингдек, ушбу тоифадаги фуқаролар учун икки ойлик синов муддатини белгилайди. Агар синовдан ўта олмаса, шартнома бекор қилинади. Бундан ташқари, Украинадаги ҳарбий ҳолат тугатилган тақдирда, шартнома амал қилмай қолади.

Маълумот учун, шу пайтга қадар Украинада 25 ёшдан 60 ёшгача бўлган эркаклар ҳарбий хизматга боришга мажбур эди. 

60 ёшдан катталарни ҳам шартнома асосида ҳарбий хизматга жалб қилишга рухсат берувчи қонун лойиҳаси апрель ойида бир гуруҳ депутатлар томонидан парламентга киритилган эди.

Эслатиб ўтамиз, жорий йилнинг 16 апрель куни Украинада ҳарбий ҳолат ва умумий сафарбарлик режими 90 кунга узайтирилгани, у 9 май кунидан бошланиши ва ушбу қонун жорий йилнинг 6 августигача амал қилиши ҳақида хабар берилганди.

Шундан сўнг, 15 июль куни бу муддат яна узайтирилди. Унга кўра, кейинги узайтириш 7 августдан кучга киради ҳамда 90 кун, яъни 5 ноябргача давом этади.