Украинада депутатлар Трампни Нобелга номзод сифатида қўллаб-қувватламади

Украина Олий Радаси АҚШ Президенти Дональд Трампни Тинчлик бўйича Нобель мукофотига номзод сифатида қўллаб-қувватлаш ҳақидаги таклифни рад этди. Бу ҳақда “Страна” хабар берди.

Нашр маълумотларига кўра, 450 депутатдан атиги 132 нафари “ҳа” деб овоз берган.

“Радада Трампни Тинчлик бўйича Нобель мукофотига номзод сифатида илгари суришни истаганлар етарли бўлмади”, дейилади хабарда.

Нашрга кўра, жорий йилнинг сентябрь ойи охирида Украина Олий Радаси маълумотлар базасида парламентнинг Дональд Трампни Тинчлик бўйича Нобель мукофотига номзод сифатида илгари суриш масаласида Нобель қўмитасига мурожаат қилиш ҳақидаги қарор лойиҳаси пайдо бўлган. Ўшанда бу ташаббусни фақат “Халқ хизматчиси” партиясининг битта депутати қўллаб-қувватлаган, бу эса мазкур ғоя Украина Президенти Владимир Зеленский маъмурияти билан келишилмаганини англатади.

Маълумот учун, эртага, 10 октябрь куни Нобель қўмитаси Тинчлик бўйича мукофот лауреатини эълон қилади. Дональд Трамп эса ушбу мукофотни олишни жуда хоҳлаётганини бир неча бор таъкидлаган. У ўзини муваффақиятли тинчликпарвар деб ҳисоблайди.

Эслатиб ўтамиз, аввалроқ Дональд Трамп фаол равишда ўзини Нобель тинчлик мукофоти номзодлари қаторига киритиш учун кампания олиб бораётгани ҳақида хабар берилган эди. Президентнинг фикрича, на у ва на АҚШ 2020 йилда имзоланган Иброҳим келишувлари – Исроил ва бир нечта араб давлатлари ўртасидаги муносабатларни нормаллаштириш бўйича келишувлар учун етарлича эътироф олмаган. Бу битимлар Трампнинг биринчи президентлик муддати даврида тузилган. Шунингдек, Трамп 2025 йилнинг январь ойида Оқ уйга қайтгач, камида олти урушни тўхтатганини урғулайди (умуман олганда у тўққизта можарода иштирок этган). У бунга Ҳиндистон ва Покистон ўртасидаги, шунингдек, Арманистон ва Озарбайжон ўртасидаги қуролли тўқнашувларни мисол қилиб келтирган.