Украина Путиннинг таклифига жавоб берди

Россия Президенти Владимир Путиннинг Украина раҳбари Владимир Зеленскийни музокара ўтказиш учун Москвага чорлови қабул қилиб бўлмайдиган таклиф. Бу ҳақда Украина Ташқи ишлар вазири Андрей Сибига Х тармоғидаги саҳифасида маълум қилди.

Сибиганинг сўзларига кўра, камида етти давлат Украина ва Россия Президентларининг учрашувига мезбонлик қилишга тайёр. Уларга Австрия, Ватикан, Швейцария, Туркия ва Форс кўрфазидаги уч давлат киради.

“Бу жиддий таклифлар ва Президент Зеленский исталган пайтда учрашувга тайёр. Аммо Путин атайлаб қабул қилиб бўлмайдиган шартларни илгари суриб, ҳаммани алдашда давом этмоқда. Россияни тинчлик жараёнига жиддий ёндашишга мажбур қиладиган ягона йўл – босимни кучайтиришдир”, дея қўшимча қилган Сибига. 

Маълумки, Путин Хитойга тўрт кунлик ташрифи якунида Зеленскийни музокара ўтказиш учун Москвага чорлаганди. Шу билан бирга, у бундай ташаббус АҚШ Президенти Дональд Трамп томонидан илгари сурилганини ҳам қайд этган. Таклиф эса кутилганидек қабул қилинмади. 

Қайд этиш жоиз, Путин ва Зеленскийнинг учрашиш эҳтимоли ҳали ҳам сўроқ остида қолмоқда, чунки икки давлат раҳбари ҳам учрашув учун бир-бири бажаришни истамайдиган шартларни ўртага ташлаяпти. Масалан, Зеленский музокараларни Москвада эмас, аксинча, Европанинг нейтрал давлатларида, хусусан, Швейцария, Австрия ёки Туркияда ўтказишни таклиф қилган. Путин эса Европага боришни истамайди. Қолаверса, ҳудудлар масаласида ҳам чалкашликлар мавжуд. Зеленский қонунни пеш қилиб, Украинанинг бир қаричи ҳам Россияга берилмаслигини айтса, Путин Зеленский айрим ҳудудлардан воз кечиши кераклигини такрорлайди. Хуллас, бу борада ҳам келишув йўқ.

Халқаро майдондаги етакчилар ҳам вақт ўтган сари учрашув эҳтимоли тобора пасайиб боярётганини айтмоқда. Масалан, Германия канцлери Фридрих Мерц 26 август куни Берлинда Канада Бош вазири Марк Карни билан биргаликда ўтказган матбуот анжуманида Россия Украина бўйича музокараларда эски услуби – вақтни чўзиш стратегиясини қўллаётгани ҳақида айтганди. Унга кўра, Москва Владимир Путин ва Владимир Зеленский учрашувини олдиндан белгиланган шартларга боғлаб, уни имконсиз ҳолатга келтирмоқда. Мерц бундай талабларни Германия ҳам, Украина ҳам мутлақо қабул қилиб бўлмайдиган деб ҳисоблашини таъкидлаган. Шунингдек, Мерц 28 август куни Франция Президенти Эммануэль Макрон билан учрашувда Россия ва Украина Президентларининг учрашуви бўлиб ўтмаслиги ҳақида гапирганди. Макрон агар бундай учрашув бўлмаса, Россияга қарши жавоб чоралари кучайтирилишини айтган.