Путин Зеленский билан учрашишга тайёрлигини айтди (видео)

Россия Президенти Владимир Путин Украина раҳбари Владимир Зеленский билан Москвада учрашишга тайёрлигини билдирди. Бу ҳақда у бугун, 3 сентябрь куни тўрт кунлик Хитой сафари якунида маълум қилди.

Унинг сўзларига кўра, Зеленский рози бўлса, музокаралар Москвада ўтказилиши мумкин. Шу билан бирга, у бундай ташаббус АҚШ Президенти Дональд Трамп томонидан илгари сурилганини ҳам қайд этган.

У, шунингдек, ҳар бир давлат ўз хавфсизлик тизимини танлаш ҳуқуқига эга экани, бироқ бу Россия ҳисобидан бўлмаслиги кераклигини билдирган. Путин Россиянинг асосий мақсади – ҳудудлар эмас, балки у ерларда яшовчи одамларнинг ўз тилида гапириш ва ўз маданияти ҳамда анъаналарини сақлаб қолиш ҳуқуқини ҳимоя қилиш эканини урғулаган.

Президентнинг сўзларига кўра, Москва бир неча бор муаммони тинч йўл билан ҳал қилишни таклиф қилган, аммо бу таклифлар эътиборсиз қолдирилган. Путиннинг айтишича, “Россия Украинанинг қилган ишларига қарамай, можарони музокаралар орқали тугатиш мумкинлигига умид қилмоқда”.

Путин, шунингдек, Трампнинг ташаббусларини ҳам тинчликка эришиш йўлидаги “жиддий уриниш” деб билишини айтган.

Давлат раҳбари Россия Қуролли кучлари барча йўналишларда ҳужумни давом эттираётгани, бироқ уларнинг асосий мақсади белгиланган вазифаларга эришиш эканини қайд этган. Шу билан бирга, Украина армияси катта ҳужум операцияларини олиб бора олмаётгани, уларнинг сафи 50 фоизга ҳам тўлмаганини таъкидлаган. Путин вазият мураккаб ва беомон экани, шу боис жиддий башоратлар қилиш мумкин эмаслигини қўшимча қилган.

Қайд этиш жоиз, Путин ва Зеленскийнинг учрашиш эҳтимоли ҳали ҳам сўроқ остида қолмоқда, чунки икки давлат раҳбари ҳам учрашув учун бир-бири бажаришни истамайдиган шартларни ўртага ташлаяпти. Масалан, Зеленский музокараларни Москвада эмас, аксинча, Европанинг нейтрал давлатларида, хусусан Швейцария, Австрия ёки Туркияда ўтказишни таклиф қилган. Путин эса Европага боришни истамайди. Қолаверса, ҳудудлар масаласида ҳам чалкашликлар мавжуд. Зеленский қонунни пеш қилиб, Украинанинг бир қаричи ҳам Россияга берилмаслигини айтса, Путин Зеленский айрим ҳудудлардан воз кечиши кераклигини такрорлайди. Хуллас, бу борада ҳам келишув йўқ.

Эслатиб ўтамиз, Германия канцлери 26 август куни Берлинда Канада Бош вазири Марк Карни билан биргаликда ўтказган матбуот анжуманида Россия Украина бўйича музокараларда эски услуби – вақтни чўзиш стратегиясини қўллаётгани ҳақида айтганди. Унга кўра, Москва Владимир Путин ва Владимир Зеленский учрашувини олдиндан белгиланган шартларга боғлаб, уни имконсиз ҳолатга келтирмоқда. Мерц бундай талабларни Германия ҳам, Украина ҳам мутлақо қабул қилиб бўлмайдиган деб ҳисоблашини таъкидлаган. Шунингдек, Мерц 28 август куни Франция Президенти Эммануэль Макрон билан учрашувда Россия ва Украина Президентларининг учрашуви бўлиб ўтмаслиги ҳақида гапирганди. Макрон агар бундай учрашув бўлмаса, Россияга қарши жавоб чоралари кучайтирилишини айтган.