Украина Путиннинг қизларига санкция жорий қилди – ОАВ

Украина ҳукумати Россияга қарши санкциялар рўйхатини кенгайтириб, унга Россия Президенти Владимир Путиннинг қизлари Катерина Тихонова ва Мария Воронцовани ҳам киритди.

Ҳаммаси бўлиб, янги санкциялар 99 жисмоний ва 178 юридик шахсга, шу жумладан Россия ва Беларусь миллий банклари мансабдор шахсларига, РФ ҳарбий-саноат комплексининг “Царьград” компаниялари ва корхоналари гуруҳига тегишли. Санкция чекловлари Украинанинг вақтинча босиб олинган ҳудудларини реинтеграция қилиш вазирлиги ташаббуси билан қабул қилинган.

Вазирлик ҳисоботида Путиннинг қизларининг исмлари тилга олинмаган, бироқ АҚШ ҳам аввалроқ уларга нисбатан санкциялар қўллагани айтилади. 

“Бундан буён тажовузкор давлат ва унинг тарафдорларига нисбатан чекловлар ҳамкор давлатлар ва Украина томонидан бир вақтда қўлланилади”, дейилади пресс-релизда.

АҚШ апрель ойи бошида “Путиннинг вояга етган қизлари”га қарши санкциялар эълон қилган эди. Европа Иттифоқи ҳам худди шундай йўл тутди.

Путин ОАВ Россия Федерацияси президентининг қизлари деб ҳисоблайдиган Катерина Тихонова ва Мария Воронцова билан қариндошлигини илгари расман тан олмаган. Бироқ санкциялар киритилгандан сўнг Кремль Путиннинг қизларига нисбатан қўйилган чекловларга жавоб беришини ва буни “ўзи хоҳлаганича қилишини” айтди. Шундай қилиб, Президентнинг Тихонова ва Воронцова билан оилавий алоқалари ҳақиқатда тасдиқланди.