Украина можаросини “музлатиш” Россия учун номақбул – ТИВ

Москва учун Украина атрофидаги можарони "музлатиш" варианти тўғри келмайди, бу инқирознинг асосий сабабларини бартараф этиш зарур. Бу ҳақда Россия Ташқи ишлар вазири ўринбосари Михаил Галузин ТАСС агентлигига берган интервьюсида маълум қилди.

“Россия Президенти Владимир Путин бир неча бор айтганидек, бу инқирознинг асосий сабабларини бартараф этмасдан туриб, ҳеч қандай “музлатиш” мумкин эмас. Кўриниб турибдики, Зеленский воқелик билан ҳар қандай алоқани йўқотган ва Киев ҳамкор деб ҳисоблайдиган мамлакатларда ҳам норозилик келтириб чиқариб, можарони кучайтиришга ҳаракат қилмоқда”, дейди у.

У 19 июль куни Қора денгиз акваториясидаги Каспий қувур консорциуми (КҚК) денгиз терминалида юклаш операциялари амалга оширилаётган вақтда Қозоғистонда қазиб олинган нефтни юклаётган иккита танкер – ASIA ва NISSOS IOS Украина дронлари ҳужумига учраганини эслади. Танкерлар бортида халқаро экипажлар бўлган.

“Фуқаролик энергетика инфратузилмаси объектларининг ваҳшиёна ўққа тутилишининг ўзи нимага тенг? Июль–август ойларида Украина Қуролли Кучлари учувчисиз учар қурилмаларни қўллаб, биринчи навбатда Қозоғистон иқтисодиёти манфаатларига хизмат қиладиган Каспий қувур консорциуми (КҚК) фаолиятини таъминловчи объектларга намойишкорона террорчилик ҳужумларини уюштирди. Жаҳон ҳамжамияти, жумладан, Киев режимига таъсир ўтказа оладиган АҚШ ва нефть-газ компаниялари КҚК акциядорлари бўлган Европа давлатлари бунга муносиб жавоб қайтаришига умид қиламиз”, деб қайд этди у.

Унинг сўзларига кўра, Россия Федерацияси Қозоғистон терроризмнинг барча шакл ва кўринишларига қарши курашиш зарурлигини жуда яхши тушунади.

“Бунга эришишнинг энг яхши йўли – Киев режимининг террорчилик фаолиятини тўхтатиш, Украина атрофидаги можаронинг асл сабабларини бартараф этиш орқали Евроосиёда тинчлик ва хавфсизликни таъминлашдир. Мамлакатимиз махсус ҳарбий амалиёт доирасида айнан шунга интилмоқда. Маълумки, хавфсизлик ё ҳамма учун бўлади, ё ҳеч ким учун бўлмайди”, дейди Галузин.