Украина гуманитар фалокат ёқасида – Тимченко

Украина гуманитар фалокат ёқасида турибди ва энергетика соҳасида сулҳ тузиш зарур. Бу ҳақда Донецк ёқилғи-энергетика компанияси (ДТЭК) бош ижрочи директори Максим Тимченко Давосда қилган чиқишида айтиб ўтди.

Тимченконинг айтишича, энергетика соҳасида ва энергетика объектларига нисбатан ўт очишни тўхтатиш зарур. Аҳоли 3-4 соат электр энергияси олади, шундан сўнг 10-15 соатлик узилиш бўлади, кўп қаватли уйлар эса бир неча ҳафтадан бери иссиқликсиз қолмоқда.

Компания ўзининг генерация қувватларининг 60-70 фоизини йўқотган ва юзлаб миллион доллар миқдорида зарар кўрган. Энергетика секторини тиклаш 65-70 миллиард долларга тушади ва кўплаб ҳолларда бутунлай янги объектлар қуришни талаб қилади.

Тимченко бу жараён оддий реконструкция эмас, балки Украинада янги энергетика тизимини барпо этиш ҳақида гап кетаётганини қайд этган.

Эслатиб ўтамиз, аввалроқ Бирлашган Араб Амирликларининг Абу-Даби шаҳрида Украинадаги урушни тугатиш бўйича уч томонлама музокаралар давом этаётган бир паллада, бугун, 24 январга ўтар кечаси Россия Украинага яна бир йирик ракета ва дрон ҳужумини уюштиргани ҳақида хабар берилган эди.