Украина Донбассдан воз кечишга тайёр – ОАВ

Украина Президенти Владимир Зеленскийнинг икки нафар маслаҳатчиси Киев Донецк вилоятининг шарқий қисмидаги айрим ҳудудлар устидан назоратдан воз кечишга тайёрлигини билдирди. Бу ҳақда манбаларга таяниб, “The Atlantic” журнали хабар берди.

Нашр мухбири Саймон Шустерга кўра, қўшинларни олиб чиқишни қонунийлаштириш учун жорий йил баҳорида тинчлик режаси бўйича референдум ўтказиш варианти кўриб чиқилган. Маслаҳатчиларнинг айтишича, овоз беришни Украина президентлик сайловлари билан бир кунда ўтказиш мумкин.

Интервьюда Владимир Зеленский бундай ёндашувга қарши эмаслигини, бу сайловчиларнинг фаоллигини ошириши ва натижаларни россияликлар томонидан шубҳа остига олишни қийинлаштириши мумкинлигини билдирган. Шу билан бирга, у бунинг учун Россия ва Украина ўртасида ҳалол келишувга эришиш зарурлигини таъкидлаган.

Саймон Шустер маълумотига кўра, Украина Президенти офиси раҳбари Кирилл Буданов Зеленский ёрдамчилари билан Украина армиясининг Донбасснинг айрим ҳудудларидан чиқиши учун узоқ музокаралар олиб борган.

Нашрнинг қайд этишича, Зеленский атрофидаги айрим шахслар тинчлик битимини тузиш имконияти тез орада ёпилиши мумкинлигидан хавотирда. Уларнинг фикрича, бу можаронинг яна кўп йилларга чўзилиб кетишига олиб келиши мумкин.

Эслатиб ўтамиз, аввалроқ Украина президентлик сайловлари ва Россия билан эҳтимолий тинчлик шартномаси бўйича референдум ўтказиш масаласини муҳокама қилишни бошлагани ҳақида хабар берилганди. АҚШ маъмурияти Украина томонидан президентлик сайлови ва тинчлик келишуви бўйича референдумни 15 майга қадар ўтказишни талаб қилган.