Украина бўйича вақтинча сулҳ Болтиқбўйининг зарарига ишлаши мумкин – FT

Болтиқбўйи давлатлари Россиянинг Украинага қарши урушида ўт очишни тўхтатиш бўйича келишувга эришилса, уларнинг хавфсизлигига таҳдид кескин кучайишидан қўрқмоқда. Бу ҳақда бугун, 30 март куни Эстония ва Литва Мудофаа вазирлари баёнотига таяниб, “The Financial Times” газетаси хабар берди.

Иккала давлат ҳам Москва Украинадаги ўт очишни тўхтатиш режимидан фойдаланиб, НАТОнинг шимоли-шарқий қанотига қўшинларни қайта қуроллантириш ва қайта жойлаштириш режаларини амалга оширишни тезлаштиришига ишонч билдирмоқда.

“Биз ҳаммамиз тушунамизки, Украинадаги уруш тўхтатилгач, Россия ўз кучларини жуда тез қайта тақсимлайди. Бу ҳам таҳдид даражаси сезиларли даражада ва жуда тез ошиб боришини англатади”, деди Эстония Мудофаа вазири Ханно Певкур.

Унинг литвалик мавқедоши Довиле Шакалене ҳам худди шундай баёнот билан чиқди.

“Келинг, ҳеч қандай иллюзияга берилмайлик. Россия Украинадан кейин тўхтайди, деб ўзимизни алдамайлик. Россия ўт очишни тўхтатгандан сўнг бу вақтдан ҳарбий салоҳиятини мустаҳкамлаш учун фойдаланади. Улар аллақачон жанг майдонида ўқитилган улкан армияга эга бўлиб, улар янада кучаяди”, дейди у.

АҚШ Президенти Дональд Трамп маъмурияти Россия ва Украина билан урушда сулҳ бўйича музокаралар олиб бормоқда, бироқ ўт очишни тўхтатиш ҳали ҳам узоқ йўл сифатида кўрилмоқда.

Ханно Певкур сўзларига кўра, ҳозирда Украинада бўлган Россиянинг 600 минг аскаридан 300 минги бошқа жойга жойлаштирилиши мумкин.

“Бу одамлар Россиянинг турли минтақаларига маккажўхори териш ёки бошқа иш қилиш учун қайтиб келмайди, чунки армияда оладиган маошлари ўз шаҳарларида олишлари мумкин бўлган маошдан беш-ўн баравар кўп”, дея тушунтирди Эстония Мудофаа вазири.

Болтиқбўйи мамлакатлари “Запад” кенг кўламли ҳарбий машғулотлари кузда Россия ва Беларусь чегараларидан унчалик узоқ бўлмаган жойда бўлиб ўтиши, унда 13 мингга яқин ҳарбий хизматчилар қатнашишидан жуда хавотирда. Ҳар тўрт йилда бир марта ўтказиладиган ушбу машғулотлар НАТО давлатлари билан қуролли тўқнашувни тақлид қилади.