Ukraina bo‘yicha vaqtincha sulh Boltiqbo‘yining zarariga ishlashi mumkin – FT

Boltiqbo‘yi davlatlari Rossiyaning Ukrainaga qarshi urushida o‘t ochishni to‘xtatish bo‘yicha kelishuvga erishilsa, ularning xavfsizligiga tahdid keskin kuchayishidan qo‘rqmoqda. Bu haqda bugun, 30 mart kuni Estoniya va Litva Mudofaa vazirlari bayonotiga tayanib, “The Financial Times” gazetasi xabar berdi.

Ikkala davlat ham Moskva Ukrainadagi o‘t ochishni to‘xtatish rejimidan foydalanib, NATOning shimoli-sharqiy qanotiga qo‘shinlarni qayta qurollantirish va qayta joylashtirish rejalarini amalga oshirishni tezlashtirishiga ishonch bildirmoqda.

“Biz hammamiz tushunamizki, Ukrainadagi urush to‘xtatilgach, Rossiya o‘z kuchlarini juda tez qayta taqsimlaydi. Bu ham tahdid darajasi sezilarli darajada va juda tez oshib borishini anglatadi”, dedi Estoniya Mudofaa vaziri Xanno Pevkur.

Uning litvalik mavqedoshi Dovile Shakalene ham xuddi shunday bayonot bilan chiqdi.

“Keling, hech qanday illyuziyaga berilmaylik. Rossiya Ukrainadan keyin to‘xtaydi, deb o‘zimizni aldamaylik. Rossiya o‘t ochishni to‘xtatgandan so‘ng bu vaqtdan harbiy salohiyatini mustahkamlash uchun foydalanadi. Ular allaqachon jang maydonida o‘qitilgan ulkan armiyaga ega bo‘lib, ular yanada kuchayadi”, deydi u.

AQSH Prezidenti Donald Tramp ma’muriyati Rossiya va Ukraina bilan urushda sulh bo‘yicha muzokaralar olib bormoqda, biroq o‘t ochishni to‘xtatish hali ham uzoq yo‘l sifatida ko‘rilmoqda.

Xanno Pevkur so‘zlariga ko‘ra, hozirda Ukrainada bo‘lgan Rossiyaning 600 ming askaridan 300 mingi boshqa joyga joylashtirilishi mumkin.

“Bu odamlar Rossiyaning turli mintaqalariga makkajo‘xori terish yoki boshqa ish qilish uchun qaytib kelmaydi, chunki armiyada oladigan maoshlari o‘z shaharlarida olishlari mumkin bo‘lgan maoshdan besh-o‘n baravar ko‘p”, deya tushuntirdi Estoniya Mudofaa vaziri.

Boltiqbo‘yi mamlakatlari “Zapad” keng ko‘lamli harbiy mashg‘ulotlari kuzda Rossiya va Belarus chegaralaridan unchalik uzoq bo‘lmagan joyda bo‘lib o‘tishi, unda 13 mingga yaqin harbiy xizmatchilar qatnashishidan juda xavotirda. Har to‘rt yilda bir marta o‘tkaziladigan ushbu mashg‘ulotlar NATO davlatlari bilan qurolli to‘qnashuvni taqlid qiladi.