Ўқувчиларнинг дарс тайёрлаётгани ҳақида ҳеч қандай фотосурат талаб этилмайди

Аввалроқ, махсус ташкил этилган Ҳукумат комиссияси ўқувчиларнинг таътил пайтида билим олиши учун Ўзбекистон Миллий телерадиокомпанияси таркибидаги телеканаллар билан ҳамкорликни йўлга қўйилгани ҳақида хабар берилган эди.

Маълумотларга кўра, телевизион дарслар миллий телерадиокомпаниянинг 4 та каналида эфирга узатилиши режалаштирилган: 1-4-синфлар учун “Ёшлар” телеканалида, 5-8-синфлар учун “Оилавий”, 9-11-синфлар учун “Маданият ва маърифат”, амалий фанлар ва 5 та муҳим ташаббус билан боғлиқ машғулотлар “Дунё бўйлаб” телеканаллари орқали эфирга узатилади.

Сўнгги кунларда кўпчилик ота-оналарда савол туғилди: Болаларнинг дарс қилаётганликларини расмга олиб, уларни мактабга ҳисобот тариқасида жўнатиш керакми?

Ушбу масалага Халқ таълими вазири ўринбосари Дилшод Кенжаев ойдинлик киритди. 

“Вазирлик томонидан ўқитувчи ёки ота-оналардан уйда дарс тайёрланаётгани ҳақида ҳисобот (фотосурат) юборишлари ҳақида ҳеч қандай топшириқ берилмаган. Фурсатдан фойдаланиб, барча ота-оналарга, педагогларга мурожаат қилиб айтмоқчимиз, ҳеч қандай ортиқча ҳисобот, қоғозбозлик ёки фотосуратлар талаб этилишига йўл қўйилмайди”, деди вазир ўринбосари.

Қадрли юртдошлар, карантин даврида зарурат бўлмаса, кўчага чиқманг. Вақтни оилангиз, фарзандларингиз даврасида ўтказинг. Унутманг, #UydaHayotBor