Ўзбекистонда коронавирусга қарши вакцина олганлар ҳаёти хавф остидами?

Ижтимоий тармоқларда коронавирусга қарши вакцина олган инсонлар ҳаёти хавф остида экани, хусусан, улар саратонга чалиниши мумкинлиги ҳақида хабарлар тарқалди. Ҳолат юзасидан Санитария-эпидемиологик осойишталик ва жамоат саломатлиги қўмитаси раисининг биринчи ўринбосари Нурмат Отабеков муносабат билдирди.

Унинг сўзларига кўра, ушбу хабарлар мутлақо асоссиз. Маълумотларга кўра, пандемия бошлангандан то ҳозиргача дунё бўйича 710 миллион киши бу касалликка чалинган, 7 миллиондан кўпроғи ҳаётдан кўз юмган. Агар вакцина топилмаган ва эмлаш тадбирлари уюшқоқлик билан ўтказилмаганда, бу рақамлар бир неча баробар юқори бўлиши мумкин эди. Буни вакцина кашф этилгунга қадар ўтган бир йил давомида ўлим кўрсаткичи юқори бўлгани ҳам яққол тасдиқлаган.

“Мутахассис сифатида шуни айтмоқчиманки, қўлланилган вакциналар геномга салбий таъсир қилмайди, бу ўз исботини топган. Тўғри, вакцинани қабул қилган айрим одамларда турли салбий ҳолатлар, масалан, нафас олиш қийинлашуви, тана ҳарорати ошиши ва юракнинг тез уриши каби белгилар кузатилган. Аммо бу вақтинчалик бўлиб, эмлангандан сўнг 2-3 кун ўтгач, барчаси ортда қолган”, дейилади хабарда.

Таъкидланишича, тармоқларда тарқалган материалда онкологик касалликлар хавфи ҳам вакцинага боғлиқлиги ва эмлашдан кейин танада пайдо бўлган салбий ҳолат (қабул қилинган вакцина)дан қутулиш учун эса карабаш ва арслонпанжаси гиёҳларидан фойдаланиш тавсия этилган ва бу ҳар бир мутахассисни таажжубга солади.

“Бу соҳадан умуман йироқ бўлган одамнинг фикридан бошқа нарса эмас. Карабаш шамоллаш, нафас йўллари яллиғланишида, арслонпанжаси эса аёлларда гормонал ҳолатни мўътадил ушлаб туриш мақсадида қайнатма сифатида ишлатиб келинган. Шундан келиб чиқилса, ушбу икки гиёҳ вакцинадан кейин пайдо бўлган иммунитетга таъсир кўрсатиш ва йўқ қилиш хусусиятига эга эмас”, дейилади хабарда.

Эслатиб ўтамиз, аввалроқ Тошкент шаҳридаги айрим мактабгача таълим ташкилотларида карантин жорий этилиши мумкинлиги ҳақида хабарлар ёлғон экани айтилганди.