UFC собиқ жангчиси ҳибсга олинди

Суринамлик UFC’нинг собиқ жангчиси Жаирзиньо Розенстрайка аёлга ҳужум қилгани учун АҚШда ҳибсга олинди. Бу ҳақда MMA fighting нашри хабар берди.

Флорида штати полицияси маълумотига кўра, Розенстрайка жорий йилнинг 20 январь куни Пемброке Пинес шаҳрида тартибсизлик ва калтаклаш айбловлари билан қўлга олинган.

Хабарларга кўра, бир аёл ҳуқуқ-тартибот идораларига мурожаат қилиб, машинада келиб чиққан жанжал чоғида Розенстрайка унинг телефонини қўлидан тортиб олганини билдирган. Шундан сўнг у аёлни бир неча бор урганини айтган. Жабрланувчи, шунингдек, Розенстрайка уни ўпишга урингани ва кейин қўлини тишлаганини ҳам маълум қилган.

Шифокорлар аёлда тиш излари, икки билагида қизариш ҳамда ўнг кўзи остида кўкаришлар борлигини қайд этган.

Розенстрайканинг сўзларига кўра, жанжал вақтида аёл биринчи бўлиб унга мушт туширган. Аёл эса ўз навбатида, машинадан чиқиб кетишга уринган пайтда ўзини ҳимоя қилиш мақсадида шундай қилганини тасдиқлаган.

Маълумот учун, 37 ёшли Жаирзиньо Розенстрайка фаолиятида 15 ғалаба ва 6 мағлубият қайд этган. Унинг UFC'даги сўнгги жанги 2025 йил февраль ойида бўлиб ўтган бўлиб, унда россиялик Сергей Павловичга ҳакамларнинг қарори билан мағлуб бўлган.