UEFA Исроилни мусобақалардан четлатишга яқин – ОАВ

Европа футбол ассоциациялари иттифоқи (UEFA) Исроилни халқаро мусобақалардан четлаштириш масаласини кўриб чиқмоқда. Бироқ UEFA’нинг ушбу масала бўйича эҳтимолий қарори 2026 йилги Жаҳон чемпионати саралашига тааллуқли бўлмайди. Бу ҳақда “The Guardian” нашри хабар берди.

Исроилни четлатиш қарори амалга ошса, мамлакатнинг эркаклар ва аёллар терма жамоалари Миллатлар лигасида, Тель-Авивнинг “Маккаби” клуби эса Европа лигасида иштирок эта олмайди. Шу билан бирга, Жаҳон чемпионати саралаш ўйинлари FIFA ваколатига киргани сабабли, Исроилнинг қатнашиш ҳуқуқи сақланиб қолиши мумкин.

“Исроилни Жаҳон чемпионати саралашидан чиқариб ташлаш бир томонлама қарор бўлиб, сиёсий жиҳатдан мураккаб оқибатларга олиб келади. АҚШ Давлат департаменти ҳам FIFA ва UEFA’га босим ўтказиб, Исроилни четлаштириш ҳаракатларига қарши чиқишини билдирган”, дейилади хабарда.

Норвегия ва Италия терма жамоалари келаси ҳафта Исроилга қарши саралаш ўйинини ўтказиши керак. Бироқ Норвегиядаги Халқаро Амнистия ташкилоти UEFA’га босимни кучайтиришга чақирмоқда. Италияда эса Ғазодаги воқеаларга қарши умумий иш ташлаш ўтказилган.

Италия футбол федерацияси президенти Габриэле Гравина Исроилни турнирдан чиқариш фақат назарий жиҳатдан унга фойда келтириши мумкинлигини айтган. Норвегия Футбол федерацияси президенти Лисе Клавенесс эса Исроилни тақиқлаш тарафдори эканини билдирди, аммо бойкот қилишни қўллаб-қувватламаслигини қўшимча қилган.

UEFA президенти Александер Чеферин ташаббуси билан ташкилот бу масала бўйича навбатдан ташқари йиғилиш ўтказиши кутилмоқда. Қарор оддий кўпчилик овози билан қабул қилинади. Манбаларга кўра, ижроия қўмитасида қарорга қарши чиқадиганлар сони жуда кам бўлиши мумкин.

Маълумот учун, UEFA тақиқ кучга кирган тақдирда ҳам Исроилнинг Жаҳон чемпионати саралашидаги ўйинларини ташкил қилиш, жумладан, ҳакамлар, хавфсизлик ва бошқа техник ишларни таъминлаш учун жавобгар бўлиб қолади.

Эслатиб ўтамиз, аввалроқ АҚШ Президенти Дональд Трамп маъмурияти Исроилни футбол бўйича Жаҳон чемпионатидан четлаштиришга қарши чиқаётгани ҳақида хабар берилган эди.