UEFA “Бавария”ни жазолади

UEFA “Бавария”ни жами 116 минг евро миқдорида жаримага тортди ҳамда Чемпионлар лигаси доирасидаги навбатдаги уй учрашуви учун стадионнинг қисман ёпилиши билан жазолади. Бу ҳақда “tribal football” нашри хабар берди.

“Бавария” декабрь ойи бошида “Спортинг”га қарши ўйинда мухлислар томонидан жамоат йўлларини тўсиб қўйиш ва тартибсизликлар содир этилгани учун айбланган эди. Натижада UEFA илгари шартли тарзда белгиланган жазони ижрога қаратди.

Шу сабабли, 21 январь куни “Унион”га қарши бўлиб ўтадиган Чемпионлар лигаси учрашувида “Альянц Арена” стадионининг 111–114-секторлар қисми ёпиқ бўлади. Қўшимча равишда бутун стадионни қисман ёпиш жазоси ҳам белгиланди, бироқ у икки йиллик синов муддати билан вақтинча тўхтатиб турилди.

Шунингдек, ноябрь ойида “Арсенал”га қарши сафардаги мағлубиятдан сўнг ҳам “Бавария”га қўшимча жарималар қўлланган. UEFA немис клубини оломон орасидаги тартибсизликлар ва буюмлар улоқтирилгани учун 40 минг евро, шунингдек, “спорт тадбирига мос келмайдиган хабарларни тарқатгани” учун 30 минг евро жаримага тортди.

Эслатиб ўтамиз, аввалроқ UEFA жорий йилнинг октябрь ойида Лондонда “Арсенал”га қарши бўлиб ўтган Чемпионлар лигаси учрашувида “Атлетико Мадрид” мухлисларининг “ирқчилик ва камситувчи хатти-ҳаракатлари” сабаб клубга 30 минг евро жарима қўллаган эди.