Туркияда муддатидан олдин президентлик сайлови ўтказилиши мумкин
Олам
−
03 Март 10090
Туркияда муддатидан олдин президентлик сайловлари 2027 йилнинг ноябрида ўтказилиши мумкин. Бу ҳақда ҳукмрон “Адолат ва тараққиёт” партияси раисининг ёрдамчиси, мамлакат парламентининг рақамли медиа бўйича қўмитаси раҳбари Ҳусайн Яйман маълум қилди.
Унинг сўзларига кўра, Ражап Тойиб Эрдўған яна ҳукмрон альянсдан номзод бўлиши мумкин.
“Худо хоҳласа, 2027 йилнинг ноябрида бўлиб ўтадиган навбатдаги президентлик сайловларида президентимизни [Эрдўған] яна бир бор номзод қилиб кўрсатамиз ва Туркия осмонида яна Республикачилар альянси байроғи ҳилпирайди. Бошқа номзодларга эҳтиёж йўқ”, деган Яйман Ҳатай вилоятида партиядошлари билан бўлган учрашувда.
Яйман Эрдўғаннинг иттифоқчиси, партия раҳбарларидан бирининг “Дунёда шундай лидер бор экан, президентлик учун бошқа номзодга эҳтиёж йўқ” деган сўзларини эслади.
У, шунингдек, АҚШ Президенти Дональд Трамп ва Владимир Зеленский ўртасидаги можарога изоҳ берди. Унинг сўзларига кўра, Президент Эрдўған Туркияни бошқарган 23 йилдан ортиқ фаолияти давомида бундай манзараларнинг бўлишига йўл қўймаган.
Маълумот учун, 20 йилдан ошиқ вақтдан бери мамлакат сиёсатининг энг юқори поғоналарида турган Туркия Президенти Ражаб Тойиб Эрдўған жорий йилнинг 26 февраль куни 71 ёшга тўлди. У 2014 йилдан бошлаб Президент сифатида фаолият юритмоқда.
