Туркияда кемаларнинг Исроилга алоқадорлиги текширилмоқда

Туркия портлари кемалардан Исроил билан алоқадор эмаслигини тасдиқловчи хатлар талаб қилмоқда. Бу ҳақда ўз манбаларига таяниб, “Cumhuriyet” хабар берди.

Кемасозлик соҳасидаги икки манбанинг маълум қилишича, Туркия портлари маъмуриятлари судхўрлик агентларидан кемалар Исроил билан боғлиқ эмаслигини ҳамда бу мамлакатга ҳарбий ёки хавфли юк ташимаётганини тасдиқловчи хатлар сўрай бошлаган.

Манбаларнинг айтишича, порт капитани идораси бундай ёзма кафолатларни тақдим этишни оғзаки топширган, аммо расмий доиравий ҳужжат чиқарилмаган. Биринчи манбага кўра, бу кўрсатма бутун Туркия портларига тааллуқлидир.

Иккинчи манбанинг маълум қилишича, кафолат хатида кема эгалари, менежерлари ва операторлари Исроил билан ҳеч қандай алоқага эга эмаслиги қайд этилади. Шунингдек, Исроилга йўналган кемаларда портловчи моддалар, радиоактив материаллар ёки ҳарбий техника каби юклар мавжуд эмаслиги кўрсатилади.

Эслатиб ўтамиз, аввалроқ Туркия Президенти Ражаб Тойиб Эрдўған Ғазо секторидаги инқироз бўйича Ғарб мамлакатларининг сусткаш позицияси халқаро ҳамжамиятга бўлган ишончни емираётганини айтганди. Эрдўғаннинг қўшимча қилишича, Туркия Ғазо масаласида бошидан буён қатъий позицияда туриб, озиқ-овқат, дори ва тиббий ёрдам етказиб бермоқда, ярадорларни даволаш учун қабул қилмоқда.