Туркияда иккита зилзила юз берди
Олам
−
04 Декабрь 2023
7319Туркия ғарбида иккита зилзила содир бўлди. Бу ҳақда TRT Haber хабар берди.
Табиий офатларни бошқариш бошқармаси сейсмологларининг маълумотларига кўра, Мармара денгизининг Гемлик кўрфазида маҳаллий вақт билан соат 10:42 да 5,1 магнитудали зилзила содир бўлган. Зилзила эпицентри 1,4 миллионга яқин аҳоли истиқомат қиладиган Бурса шаҳридан 32 км шимоли-ғарбда жойлашган. Зилзила эпимаркази 9 км чуқурликда жойлашган.
Зилзила Истанбул, Кожаэли, Чаноққалъа, Билежик ва Сакарьяда ҳам сезилган.
Орадан 3 дақиқа ўтгач, худди шу жойда яна 4,5 магнитудали зилзила қайд этилган.
Туркия Ички ишлар вазири Али Ерлиқоя Х ижтимоий тармоғида зилзиладан сўнг мутахассислар зарарни текширишга киришганини маълум қилган.
Эслатиб ўтамиз, жорий йилнинг февраль ойида Туркия жануби-шарқида 7,7 ва 7,6 магнитудали кучли зилзилалар содир бўлган эди. Зилзила қурбонлар сони 50 мингдан ошганди. Шунингдек, мамлакатнинг Атроф-муҳит, урбанизация ва иқлим ўзгариши вазирлиги 763 000 та бинога зарар етгани, камида 41 791 бино жиддий шикастланган ёки вайрон бўлганини маълум қилган. Кейинчалик Туркиянинг Истанбул шаҳри ва Мармар денгизи минтақасида 7 ва ундан юқори балли кучли зилзила содир бўлиши башорат қилинганди. Шундан сўнг мамлакат ҳукумати Истанбулни ҳалокатли зилзилага тайёрлашни бошлади. Хусусан, шаҳарда кутилаётган кучли зилзиладан энг оғир зарар кўрадиган туманлар рўйхати эълон қилинди.