Тўқаев Қозоғистонда АЭС қурилишини овозга қўймоқчи

Қозоғистон Президенти Қосим-Жомарт Тўқаев мамлакатда атом электр станцияси қуришни овозга қўйиш учун референдум ўтказишни таклиф қилди. Бу ҳақда Қозоғистон Республикаси Президентининг расмий веб-саҳифасида хабар берилди.

Унга кўра, Тўқаев бугун, 1 сентябрь куни Қозоғистон Республикаси Конституциясига мувофиқ парламентнинг VIII чақириқ иккинчи сессиясида аҳолига мурожаат билан чиқди. Мамлакат Президенти ўз нутқида Қозоғистоннинг энергетика салоҳияти, соҳада эришилган муваффақиятлар ва келажакдаги режалар ҳақида гапирар экан, АЭС қурилиши ривожланиб бораётган мамлакат учун муҳимлигини айтиб ўтди. 

“Атом энергетикасини ривожлантириш айниқса муҳим иқтисодий ва сиёсий масала бўлди. Мамлакатимизда атом электр станциясини қуриш мақсадга мувофиқлиги тўғрисида турли хил фикрлар мавжудлигини биласиз. Бир томондан, Қозоғистон дунёдаги энг йирик уран ишлаб чиқарувчиси сифатида ўзининг атом авлодига эга бўлиши керак. Баъзи мутахассислар кичик реакторли станциялар қуриш тарафдори. Бошқа томондан, кўплаб фуқаролар ва бир қатор мутахассислар атом электр станциялари хавфсизлиги билан боғлиқ муаммоларга дуч келишяпти. Ва бу Семипалатинск ядровий полигонининг фожиали меросини ҳисобга олган ҳолда тушунарли. Ушбу масала бўйича жамоатчилик муҳокамасини давом эттириш зарур”, деган у ўз нутқида.

Унинг сўзларига кўра, АЭС қурилиши Тўқаев 2019 йилги сайловолди платформасида энг муҳим стратегик муаммолар бўйича қарорлар референдумлар орқали қабул қилиниши ҳақидаги ваъдасининг бир қисмидир. 

“Атом электр станцияларини қуриш ёки буни рад этиш мамлакатимиз келажаги билан боғлиқ жуда муҳим масала”, деган у.

Эслатиб ўтамиз, Қозоғистон ўзининг биринчи атом электр станциясини Олмаота вилоятининг Жамбил туманидаги Улкен қишлоғи ҳудудида – Тошкентдан 700 км узоқликда қуришни режалаштирмоқда.